An bealach is fearr chun borradh a chur faoi acmhainneacht an Limistéir Eorpaigh Taighde

Oibríonn an Limistéar Eorpach Taighde chun timpeallacht dhinimiciúil tharraingteach a chruthú do thaighdeoirí agus do nuálaithe ar fud na hEorpa chun aghaidh a thabhairt ar an ilroinnt i dtírdhreach taighde na hEorpa. Sa teachtaireacht is déanaí ón Aontas léirítear go bhfuil dul chun cinn suntasach déanta ag an Aontas maidir leis an réimse a dhéanamh níos tarraingtí, níos éifeachtúla agus níos comhtháite, ach léirítear freisin go bhfuil deis ann borradh a chur faoi acmhainneacht an limistéir a thuilleadh.  

Sainaithnítear 4 réimse sa teachtaireacht ina bhfuil gá le gníomhaíocht amach anseo: 

• Tús áite a thabhairt d’infheistíochtaí agus d’athchóirithe: tá an tAontas ag obair le tíortha an Aontais chun iarrachtaí taighde agus nuálaíochta a ailíniú, agus chun tacú le hathchóirithe agus le hinfheistíochtaí. Mar sin féin, tá an Eoraip fós i bhfad ón sprioc 3% de OTI an Aontais a infheistiú i dtaighde agus i bhforbairt a bhaint amach. Ní mór tuilleadh oibre a dhéanamh chun bacainní rialála, dlíthiúla agus riaracháin ar infheistíocht phríobháideach a laghdú, rud atá ríthábhachtach chun níos mó infheisteoirí agus nuálaithe a mhealladh. 
• Feabhas a chur ar an rochtain ar bharr feabhais: Chuidigh an tacaíocht a cuireadh ar fáil faoi chlár Fís Eorpach agus scéimeanna soghluaisteachta an Aontais chun líonraí um chomhar eolaíoch a threisiú. Tá breis agus €1 bhilliún infheistithe leis an gclár freisin chun tacú le hacmhainneachtaí taighde agus nuálaíochta níos láidre a fhorbairt i dtíortha san Aontas nach bhfuil ag feidhmiú chomh maith céanna. Mar sin féin, tá gá le tuilleadh oibre chun maorlathas a laghdú agus chun eolas níos fearr a chur ar fáil maidir leis na deiseanna atá ar fáil do thaighdeoirí. 
• Tionchar eacnamaíoch a bhaint as na torthaí: Is í an Chomhairle Nuálaíochta Eorpach an t-infheisteoir is mó sa teicneolaíocht dhomhain san Eoraip anois. Thacaigh an Limistéar Eorpach Taighde, i gcomhar le tíortha an Aontais, le forbairt treorach spriocdhírithe maidir le saothrú eacnamaíoch torthaí taighde agus treochlár teicneolaíochta, ach tá níos mó caipiteal fiontair de dhíth ar an Eoraip go fóill chun nuálaíochtaí ceannródaíocha a bhaint amach.  
• An Limistéar Eorpach Taighde a láidriú: A bhuí leis an Limistéar Eorpach Taighde, táthar tar éis dul chun cinn suntasach a dhéanamh maidir le feabhas a chur ar dhálaí oibre agus ar fhorbairt gairme do thaighdeoirí, ach is féidir tuilleadh a dhéanamh. I gcomhréir le luachanna Eorpacha, bhí Fís Eorpach ar thús cadhnaíochta chun borradh breise a chur faoin gcomhionannas inscne agus faoin tsláine taighde, faoin eolaíocht oscailte agus faoi iarrachtaí comhroinnte sonraí. Mar sin féin, tá gá le tuilleadh iarrachta chun aghaidh a thabhairt ar na héagothromaíochtaí atá fós ann maidir le deiseanna forbartha gairme ar fud an Aontais agus chun inbhuanaitheacht agus inrochtaineacht fhadtéarmach na mbonneagar taighde agus teicneolaíochta Eorpach a chinntiú. 

I dtuarascáil Draghi le déanaí agus sna treoirlínte polaitiúla le haghaidh an chéad Choimisiúin eile, cuirtear i dtábhacht an dóigh a bhfuil an taighde agus an nuálaíocht ina spreagadh ríthábhachtach don athléimneacht eacnamaíoch, don iomaíochas agus don fholláine. Athdhearbhaítear sa teachtaireacht is déanaí seo tiomantas an Aontais an taighde agus an nuálaíocht a chur i gcroílár fhás na hEorpa amach anseo. 

Tuilleadh eolais 

An Limistéar Eorpach Taighde 

An tArdán um an Limistéar Eorpach Taighde 

Clár Oibre Beartais an Limistéir Eorpaigh Taighde 2022-24 

Fís Eorpach 

Tuarascáil Draghi

Treoirlínte polaitiúla 2024‑2029

Preaseisiúint: Anailís déanta ag an gCoimisiún ar an bhféidearthacht borradh a chur faoin Limistéar Eorpach Taighde