An Eoraip ag obair le chéile chun beatha daoine a shábháil

Le blianta beaga anuas, tarlaíonn tubaistí nádúrtha níos minice agus tá siad níos déine ná mar a bhí riamh. Téann siad i bhfeidhm ar gach réigiún Eorpach agus is iad is cúis le líon ard daoine a ghortaítear agus le damáiste suntasach don bhonneagar agus don chomhshaol. Tá ról ríthábhachtach ag an Aontas maidir le freagairtí ar tubaistí a chomhordú ar fud na hEorpa agus níos faide i gcéin, agus aghaidh á tabhairt aige ar eipidéimí, tuilte, stoirmeacha, dóiteáin foraoise, creathanna talún agus tubaistí arb iad daoine is cúis leo. 

Níl aon teorainneacha ag tubaistí agus is féidir leo tír amháin nó roinnt tíortha a bhualadh ag an am céanna gan choinne. Freagairt chomhpháirteach dhea-chomhordaithe, cinntíonn sí pointe teagmhála aonair le linn éigeandálaí, rud a fheabhsaíonn éifeachtúlacht agus éifeachtacht. In 2001 bunaíodh Sásra an Aontais um Chosaint Shibhialta chun comhar a neartú i measc thíortha an Aontais agus 10 stát rannpháirteacha maidir le cosaint shibhialta, sásra a chuireann feabhas ar chosc, ullmhacht agus freagairt i gcás tubaistí.

Nuair a tharlaíonn éigeandáil, is féidir le haon tír cúnamh a iarraidh tríd an Lárionad Comhordúcháin Práinnfhreagartha (ERCC). Feidhmíonn an Lárionad 24/7, déanann sé faireachán ar imeachtaí domhanda agus cinntíonn sé go gcuirtear tacaíocht éigeandála ar fáil go tapa trí naisc dhíreacha le húdaráis náisiúnta cosanta sibhialta. Is féidir foirne agus trealamh speisialaithe, cuir i gcás eitleáin comhraic dóiteáin, cuardach agus tarrtháil, chomh maith le foirne leighis, a shlógadh go tapa le haghaidh misin laistigh agus lasmuigh den Eoraip araon. Leis an gcur chuige sin, comhthiomsaítear saineolas agus acmhainní an chéad fhreagróra, seachnaítear dúbláil iarrachtaí, agus cinntítear seachadadh tapa cabhrach.

Chun an fhreagairt a phleanáil, is féidir le ERCC brath ar Sheirbhís Bainistithe Práinne Copernicus (EMS), a sholáthraíonn eolas geospásúil tráthúil beacht chun oibríochtaí fóirithinte tubaistí a phleanáil. Tugann sé aghaidh ar chineálacha éagsúla tubaistí agus tacaíonn sé le hiarrachtaí coisctheacha, ullmhachta, freagartha agus téarnaimh.

Le rescEU, atá á mhaoiniú go hiomlán ag an Aontas agus á óstáil ag na Ballstáit, cuirtear tuilleadh feabhais ar chosaint tubaistí agus bainistíonn sé rioscaí atá ag teacht chun cinn. Áirítear leis an gcúlchiste acmhainneachtaí Eorpacha sin eitleáin comhraic dóiteáin, héileacaptair, eitleáin aslonnaithe leighis, stoc-chairn earraí leighis agus ospidéil mhachaire atá réidh le haghaidh éigeandálaí sláinte. Chun ullmhúchán a dhéanamh do shéasúr falscaithe 2024, tá cabhlach de 32 shócmhainn aerchomhraic dóiteáin agus 556 chomhraiceoir dóiteáin curtha ar bun ag an Aontas ar fud na hEorpa, agus is rud sa bhreis ar an méid a chuirtear ar fáil trí chúlchiste rescEU.

I gcás éigeandálaí sláinte, comhordaíonn an Cór Liachta Eorpach freagairtí éigeandála sláinte Eorpacha faoi Shásra an Aontais um Chosaint Shibhialta. Ó 2020 i leith neartaigh an tAontas a ullmhacht leighis trí rescEU. Áirítear leis sin cúlchistí earraí leighis agus acmhainní aslonnaithe chun acmhainneacht an Chóir Liachta Eorpaigh le haghaidh mearchúnamh leighis a threisiú laistigh agus lasmuigh den Aontas araon.

Chun cabhair a fháil láithreach i gcásanna éigeandála, tá an uimhir éigeandála Eorpach 112 ar fáil saor in aisce ar fud an Aontais. Nuair a chuireann tú glaoch ar 112, nasctar thú le seirbhísí éigeandála, otharcharr, briogáid dóiteáin, nó póilíní san áireamh, trí oibreoirí sainoilte a threoraíonn na glaonna chuig an tseirbhís chuí.

Cur chuige aontaithe na hEorpa maidir le freagairt ar thubaistí, trí Shásra an Aontais um Chosaint Shibhialta agus rescEU, léiríonn sé neart an chomhair maidir le beatha daoine a chosaint agus tionchair tubaistí a íoslaghdú.

Tuilleadh eolais

Falscaithe

Sásra an Aontais um Chosaint Shibhialta

rescEU

An Cór Liachta Eorpach

Lárionad Comhordúcháin Práinnfhreagartha (ERCC)

Seirbhís Bainistithe Práinne Copernicus

112: Uimhir éigeandála an Aontais

EU Protects: How Europe came together to fight forest fires

Mearchúnamh an Aontais: An chaoi a bhfreagraíonn an Eoraip ar Thubaistí Domhanda