Molann an Coimisiún an aip fíorúcháin aoise a chur i bhfeidhm go tapa

Tá an Coimisiún Eorpach ag tathant ar thíortha an Aontais Eorpaigh dlús a chur le leathadh amach aip fíorúcháin aoise an Aontais, agus is é is aidhm dó í a chur ar fáil do shaoránaigh faoi dheireadh 2026.

Tá an aip Eorpach fíorúcháin aoise ceaptha páistí a chosaint ar líne ar dhóigh níos fearr agus tá sí réidh anois lena cur i bhfeidhm i dtíortha an Aontais Eorpaigh. Leis an aip, beidh úsáideoirí in ann a n-aois a chruthú gan sonraí pearsanta nach bhfuil gá leo a chomhroinnt agus an t-idirlíon a bhrabhsáil agus príobháideachas iomlán ann, agus ag an am céanna, déanfar a chinntiú nach féidir le páistí teacht ar ábhar míchuí. 

Is féidir le tíortha an Aontais í a chur i bhfeidhm mar aip neamhspleách nó í a chomhtháthú sna Tiachóga Eorpacha Céannachta Digití. Chun a chinntiú go mbeidh sí ar fáil agus í idir-inoibritheach go pras, molann an Coimisiún do thíortha an méid seo a leanas a dhéanamh:

• treoirphlean aip fíorúcháin aoise an Aontais a úsáid, rud is féidir a chur in oiriúint dá riachtanais féin
• pleananna cur chun feidhme a fhorbairt chun a chinntiú go nglacfar réitigh fíorúcháin aoise go pras
• oibriú le chéile agus teagmháil a dhéanamh le Comhordaitheoirí Seirbhísí Digiteacha, tíortha eile den Aontas, an Coimisiún, taighdeoirí agus an tsochaí shibhialta agus a réitigh náisiúnta á gcur i bhfeidhm acu
• comhlíonadh caighdeán cibearshlándála a chinntiú trí ghrinnscrúdú neamhspleách tríú páirtí.

Ina theannta sin, bunóidh an Coimisiún scéim fíorúcháin aoise de chuid an Aontais. Leagtar amach sa scéim critéir do sholáthraithe seirbhísí cruthúcháin aoise agus d’fhorbróirí réiteach fíorúcháin aoise. Bunaithe ar na critéir sin, foilseoidh an Coimisiún liosta soláthraithe a chomhlíonann caighdeáin phríobháideachais agus slándála.

Príomhthosaíocht de chuid an Choimisiúin is ea páistí agus déagóirí a chosaint agus a chumhachtú ar líne. Is gné amháin é fíorú aoise de chreat níos leithne, ina bhfuil an Gníomh um Sheirbhísí Digiteacha (GSD) san áireamh, an plean gníomhaíochta in aghaidh na cibearbhulaíochta, an straitéis le haghaidh idirlíon níos fearr do leanaí, agus tuilleadh nach iad. Chuir Uachtarán an Choimisiúin, Ursula von der Leyen, painéal speisialta saineolaithe ar bun freisin chun cur chuige Eorpach láidir praiticiúil a fhorbairt i leith sábháilteacht páistí ar líne. 

Faoin nGníomh um Sheirbhísí Digiteacha, ní mór d’ardáin ar líne ardleibhéal príobháideachais, slándála agus sábháilteachta a chinntiú do mhionaoisigh ar líne. Le déanaí, réamh-mheas an Coimisiún gur sháraigh Meta na rialacha sin toisc nár chuir sé cosc ar mhionaoisigh faoi bhun 13 bliana d’aois Instagram agus Facebook a úsáid.

Tuilleadh eolais

Freagra ón Leas-Uachtarán Feidhmiúcháin Virkkunen

Ceisteanna agus freagraí: Réiteach fíorúcháin aoise an Aontais

Cur chuige an Aontais maidir le fíorú aoise

Mionaoisigh a chosaint ar líne

An geilleagar digiteach agus an tsochaí dhigiteach