Nipproteġu lin-nies u nsaħħu l-preparatezza u r-reżiljenza

Baġit imfassal għar-reżiljenza u l-aġilità

Ir-riskji dejjem akbar ta’ temp estrem, attakki ibridi, qtugħ tal-elettriku, u tixrid tal-mard jeħtieġu li l-UE żżid il-preparatezza tagħha. Il-baġit li jmiss qed jippjana li jikseb dan bi: 

• Sħubijiet nazzjonali u reġjonali ġodda li se jappoġġaw l-investimenti u r-riformi fl-oqsma kollha tal-preparatezza u l-ġestjoni tal-kriżijiet u li jitfasslu skont il-ħtiġijiet lokali.
• Il-Faċilità tal-UE li se tħaffef l-aċċess għall-appoġġ ta’ solidarjetà tal-UE wara d-diżastri.
• Riżerva agrikola li se tappoġġa lill-bdiewa u tistabbilizza s-swieq jekk ikun meħtieġ.
• Il-Fond Ewropew għall-Kompetittività li se jixpruna l-preparatezza tal-Ewropa f’setturi ewlenin, billi jiżviluppa kapaċitajiet industrijali u jiffinanzja teknoloġiji mill-aktar avvanzati. Se jsaħħaħ ukoll l-investimenti tal-UE fis-saħħa u fil-kura tas-saħħa biex il-komunitajiet jiġu protetti aħjar.
• L-Istrument Ewropa Globali li se jappoġġa lill-pajjiżi sħab biex jipprevjenu t-tixrid ta’ kriżi. 

Mekkaniżmu tal-protezzjoni ċivili msaħħaħ

Mekkaniżmu tal-Unjoni msaħħaħ għall-Protezzjoni Ċivili, flimkien ma’ finanzjament sod għall-preparatezza u r-rispons f’każ ta’ emerġenza tas-saħħa, se jsaħħaħ ferm il-kapaċità tal-UE li timmaniġġa l-kriżijiet. Dan se jgħin biex tinbena sistema aktar effettiva biex tappoġġa lill-pajjiżi meta jiġru xi diżastri; minn nirien fil-foresti u għargħar għal terremoti u emerġenzi tas-saħħa transsettorjali.  

Billi ttejjeb il-koordinazzjoni fost l-Istati Membri, l-UE tista’ tirrispondi aktar malajr u b’mod aktar effiċjenti. Dawn il-miżuri se jipproteġu aħjar lin-nies, lill-ambjent, il-proprjetà u l-wirt kulturali kemm mid-diżastri naturali u anki mid-diżastri kkawżati mill-bniedem. Barra minn hekk, bil-konsolidazzjoni tal-finanzjament għall-protezzjoni ċivili u l-preparatezza tas-saħħa se jkunu jistgħu jsiru risponsi ta’ emerġenza aktar malajr u aktar immirati.