Saoirse na meán

Bí ar an eolas

An méid is cás leat, cosnaíonn an tAontas é, cuir i gcás an ceart agat eolas neamhspleách iontaofa a fháil.

In áiteanna áirithe den domhan, ní thugtar cead cainte d’iriseoirí, cuirtear srian leis na meáin agus ní chuirtear ach insint amháin ar an scéal os comhair an tsaoil.

San Aontas, tá saoirse ag an bpreas ceisteanna deacra a chur, iad siúd atá i gcumhacht a thabhairt chun cuntais agus foinsí iontaofa faisnéise a chur ar fáil. A bhuí leis an daonlathas, is faoi bhláth a bhíonn iolrachas na meán agus an preas saor, rud a chuireann ar do chumas agat tuiscint a fháil ar a bhfuil ag tarlú agus do chinneadh féin a dhéanamh faoi.

Cén chaoi a dtugtar cosaint do na saoirsí sin?

Ní smaointí teibí iad sin. Is fíorshaoirsí iad, agus oibríonn an tAontas gach aon lá chun iad a chosaint. Sa Chairt um Chearta Bunúsacha, ráthaítear an tsaoirse chun tuairimí a nochtadh agus faisnéis a fháil, saoirse agus iolrachas na meán ina measc, do gach duine san Aontas. Agus tacaítear leis na ráthaíochtaí sin le dlíthe láidre.

Cuidíonn reachtaíocht an Aontais, cuir i gcás an Gníomh Eorpach um Shaoirse na Meán, chun iriseoirí agus a gcuid foinsí a choinneáil sábháilte, neartaíonn sí neamhspleáchas eagarthóireachta agus cosnaíonn sí eagraíochtaí meán ar chur isteach míchuí nó ar imeaglú dlíthiúil. Mar shampla, má nochtann iriseoir éilliú nó mí-úsáid cumhachta, cuidíonn rialacha frith-SLAPP lena gcosaint ar iad a chur ina dtost trí chásanna cúirte mí-úsáideacha atá ceaptha a gcuid ama agus acmhainní a thaoscadh.

Tá ról gníomhach ag an Aontas maidir le tacú leis na meáin neamhspleácha, faoi shaoirse. Trína chláir mhaoiniúcháin, cuidíonn sé chun tionscadail a chothú a chuireann tírdhreach láidir iolraíoch na meán chun cinn.

Mar shampla, trí snáithe MEDIA de chuid chlár Eoraip na Cruthaitheachta, maoiníonn an tAontas iriseoireacht neamhspleách imscrúdaitheach áitiúil ar fud na hEorpa, chun gur féidir leis an bpreas leanúint d’eolas a chur ar fáil duit, an chumhacht a chur i dtábhacht, agus an daonlathas a choinneáil láidir.

^{Foinsí: Eorabharaiméadar, mí na Nollag 2025 agus Eorabharaiméadar Speisialta, mí na Samhna 2025}