Skart xejn, skużi xejn: x’qed tagħmel l-UE biex timmaniġġja l-iskart aħjar

Kull sena, fit-30 ta’ Marzu, ikollna l-jum internazzjonali ‘Żero Skart’ biex infakkru l-importanza li l-iskart jiġi mmaniġġjat b’mod responsabbli u biex ninkoraġġixxu s-sostenibbiltà fil-konsum u fil-produzzjoni. Fl-UE, persuna normalment tipproduċi 511-il kg skart kull sena u huwa biss 38% tal-iskart li jiġi riċiklat. Din hija sfida serja u l-UE qed tieħu azzjoni biex tindirizzaha. Ejjew nagħtu ħarsa lejn kif qed tagħmel dan.

Hemm tliet objettivi ewlenin li jirregolaw il-mod kif qed taħdem l-UE dwar il-ġestjoni tal-iskart:

• it-titjib tal-immaniġġjar tal-iskart
• il-promozzjoni tal-innovazzjoni fil-qasam tar-riċiklaġġ
• il-limitazzjoni tar-rimi fil-miżbliet

Id-Direttiva Qafas dwar l-Iskart hija l-qafas legali tal-UE għat-trattament u l-ġestjoni tal-iskart fl-UE. Din tintroduċi ordni ta’ preferenza għall-immaniġġjar tal-iskart imsejħa il-“ġerarkija tal-iskart”, fejn il-prevenzjoni hija l-għażla ppreferuta u r-rimi huwa l-aħħar għażla. Hemm ukoll ħafna regoli tal-UE, aktar immirati, dwar kollox— mill-batteriji sal-iskart bijodegradabbli u mit-tbaħħir sal-vetturi li m’għadhomx jintużaw.

Fi Frar, daħlu fis-seħħ ir-regoli tal-UE dwar l-imballaġġ u l-iskart mill-imballaġġ, li għandhom l-għan li jnaqqsu l-użu tal-plastik li jintuża darba biss, li jwassal għal volum massiv ta’ skart fl-ambjent. Dan jinkludi, pereżempju, kontenituri żgħar tal-plastik għall-kondimenti, għaz-zlazi, għaz-zokkor, u għas-sostituti tal-ħalib għal mal-kafè, li jintużaw darba biss u mbagħad jintremew, u li għandhom jiġu mfittxija alternattivi għalihom.

Il-ħidma lejn ekonomija aktar ċirkolari u reżiljenti m’għandhiex x’taqsam biss mas-sostenibbiltà ambjentali iżda daqstant ieħor ma’ li tingħata spinta lill-kompetittività tal-UE. B’ħarsitha lejn il-futur u biex tikkontribwixxi għall-ħolqien tad-domanda tas-suq għal materjali sekondarji u ta’ suq uniku għall-iskart, il-Kummissjoni qed tippjana att leġiżlattiv ġdid dwar l-ekonomija ċirkolari li huwa previst għall-2026.

Għal aktar informazzjoni

L-iskart u r-riċiklaġġ fl-UE

Id-Direttiva Qafas dwar l-Iskart