Il-Jum għal Internet aktar Sikur jippromwovi użu aktar sikur u aktar responsabbli tat-teknoloġija online, speċjalment għat-tfal u ż-żgħażagħ. Din is-sena, dan il-Jum se jkun fil-11 ta’ Frar u qed isir appell lill-partijiet ikkonċernati madwar id-dinja biex jieħdu passi konkreti biex jagħmlu l-internet aktar sikur u aktar inklużiv għal kulħadd. Iċ-ċelebrazzjonijiet u l-attivitajiet ta’ sensibilizzazzjoni se jsiru matul Frar u kulħadd huwa mistieden jingħaqad mal-moviment. Fl-UE, 97% taż-żgħażagħ jużaw l-internet kuljum. L-UE hija impenjata li tiżgura li kulħadd ikun sikur online. Peress li l-minorenni huma fost l-aktar gruppi vulnerabbli, l-UE tagħmel enfasi speċifika fuq il-protezzjoni tagħhom permezz ta’ diversi inizjattivi: L-Att dwar is-Servizzi Diġitali: biex niġġieldu kontra l-bullying ċibernetiku, il-kontenut illegali, id-diżinformazzjoni, u affarijiet oħrajn. Dan jesiġi li l-pjattaformi online jimplimentaw salvagwardji aktar b’saħħithom għall-minorenni, inklużi l-kontrolli tal-ġenituri, il-verifika tal-età, u l-limiti fuq ir-reklamar immirat. In-network taċ-Ċentri għal Internet iktar Sikur: biex noffru kampanji ta’ sensibilizzazzjoni, linji telefoniċi għall-għajnuna, linji telefoniċi diretti, u servizzi ta’ parteċipazzjoni taż-żgħażagħ. Dawn jagħtu lit-tfal, lill-ġenituri, u lill-edukaturi għodod u għarfien biex jirrikonoxxu t-theddid online u jirrapportaw kontenut dannuż. Internet Aħjar għat-Tfal: strateġija biex jinħolqu esperjenzi diġitali aktar sikuri għat-tfal. Din tipproteġihom minn kontenut dannuż u illegali, toħloq ambjent diġitali adattat skont l-età, tagħtihom il-ħiliet diġitali meħtieġa biex ikollhom il-kapaċità li jieħdu d-deċiżjonijiet fl-aħjar interess tagħhom, u tappoġġa l-parteċipazzjoni tagħhom fit-tfassil tal-politiki tal-internet. Il-Jum għal Internet aktar Sikur beda bħala inizjattiva tal-UE fl-2004 u minn dak iż-żmien ’l hawn żviluppa f’moviment globali, li jiġi ċċelebrat f’aktar minn 180 pajjiż kull sena. B’ħidma flimkien, dawk li jfasslu l-politika, ir-rappreżentanti tal-industrija, l-organizzazzjonijiet tas-soċjetà ċivili, l-edukaturi, u ż-żgħażagħ infushom jgħinu biex tinħoloq dinja diġitali aktar sikura għall-ġenerazzjonijiet futuri. Għal aktar informazzjoni Il-Jum għal Internet aktar Sikur L-Att dwar is-Servizzi Diġitali Ċentri għal Internet Iktar Sikur Internet Aħjar għat-Tfal Dettalji Data tal-pubblikazzjoni11 Frar 2025AwturId-Direttorat Ġenerali għall-Komunikazzjoni
