Miżuri aktar b’saħħithom biex jiġu protetti d-demokrazija u s-soċjetà ċivili tagħna

Id-demokraziji tagħna jinsabu mhedda fid-dinja tal-lum ta’ kunflitti internazzjonali u ta’ tfixkil teknoloġiku li qed jikber. Ir-reġimi awtoritarji jfittxu li jimminaw il-fiduċja tagħna fl-istituzzjonijiet demokratiċi, fl-elezzjonijiet ħielsa u ġusti u fil-valuri li fuqhom hija msejsa l-Unjoni Ewropea. Biex tiġġieled din it-theddida, il-Kummissjoni Ewropea ppreżentat it-“Tarka Ewropea għad-Demokrazija” li tipprovdi miżuri konkreti biex tagħti s-setgħa, tipproteġi u tippromwovi demokraziji b’saħħithom u reżiljenti, filwaqt li tappoġġa u tissalvagwardja wkoll l-organizzazzjonijiet tas-soċjetà ċivili li għandhom rwol essenzjali fit-trawwim tal-ħajja demokratika.

Il-miżuri tat-Tarka għad-Demokrazija se jiffukaw fuq tliet oqsma ewlenin: 

is-salvagwardja tal-integrità tal-ispazju tal-informazzjoni 

• billi jitħejja protokoll dwar l-inċidenti u l-kriżijiet skont l-Att dwar is-Servizzi Diġitali biex tiġi ffaċilitata l-koordinazzjoni u jiġu żgurati reazzjonijiet rapidi   
• l-istabbiliment ta’ Network Ewropew indipendenti ta’ verifikaturi tal-fatti  
• l-appoġġ lill-Osservatorju Ewropew tal-Media Diġitali. 

it-tisħiħ tal-istituzzjonijiet tagħna, elezzjonijiet ħielsa u ġusti u media ħielsa u indipendenti  

• billi tissaħħaħ il-ħidma skont in-Network Ewropew ta’ Kooperazzjoni dwar l-Elezzjonijiet
• l-aġġornament tas-Sett ta’ Għodod tal-Elezzjonijiet tal-Att dwar is-Servizzi Diġitali (DSA, Digital Services Act)
• il-preżentazzjoni ta’ Rakkomandazzjoni dwar is-sikurezza tal-ġurnalisti u gwida dwar is-sikurezza tal-atturi politiċi
• it-tisħiħ tal-appoġġ finanzjarju għall-ġurnaliżmu indipendenti u lokali
• l-immodernizzar tar-regoli tar-reklamar biex titrawwem is-sostenibbiltà tal-media tal-UE
• it-tisħiħ tal-azzjoni biex jiġi appoġġat il-qafas eżistenti tal-UE għall-ġlieda kontra l-kawżi strateġiċi abbużivi kontra l-parteċipazzjoni pubblika (SLAPPs, strategic lawsuits against public participation). 

it-tisħiħ tar-reżiljenza tas-soċjetà u l-involviment taċ-ċittadini 

• billi jitrawwem il-litteriżmu medjatiku u diġitali għall-etajiet kollha
• l-iżvilupp ta’ linji gwida biex tissaħħaħ l-edukazzjoni ċivika  fl-iskejjel
• il-promozzjoni tal-involviment taċ-ċittadini, b’mod partikolari ż-żgħażagħ u l-livelli lokali, fil-ħajja demokratika, permezz ta’ għodod parteċipattivi ġodda
• l-istabbiliment ta’ ċentru ġdid tat-teknoloġija ċivika
• il-preżentazzjoni ta’ gwida tal-UE dwar id-demokrazija. 

Il-Kummissjoni se tistabbilixxi wkoll Ċentru Ewropew ġdid għar-Reżiljenza Demokratika biex jirreżisti t-theddid komuni li qed jevolvi, bħad-diżinformazzjoni u l-indħil barrani fl-elezzjonijiet. 

Fl-istess ħin, il-Kummissjoni se żżid l-involviment tagħha mas-soċjetà ċivili, u se tkompli tappoġġa u tipproteġi lill-organizzazzjonijiet tas-soċjetà ċivili fil-ħidma tagħhom permezz ta’ strateġija fuq tliet livelli: 

• trawwim tal-involviment: l-istabbiliment ta’ Pjattaforma ġdida tas-Soċjetà Ċivili sal-2026 biex jiġi ffaċilitat aktar id-djalogu dwar il-protezzjoni u l-promozzjoni tal-valuri tal-UE.
• appoġġ u protezzjoni: il-ħolqien ta’ Ċentru ta’ Għarfien online dwar l-Ispazju Ċiviku biex jiġi ffaċilitat l-aċċess għal proġetti u għodod eżistenti, inklużi l-miżuri ta’ protezzjoni disponibbli. 
• finanzjament sostenibbli u trasparenti: iż-żieda b’mod sinifikanti tal-appoġġ finanzjarju lill-OSĊ skont il-baġit fit-tul il-ġdid tal-UE, b’€9 biljun previsti għall-programm AgoraEU biss.  

Għal aktar tagħrif 

Nipproteġu d-demokrazija u niddefendu l-valuri tagħna 

Demokrazija u drittijiet elettorali  

Spazju ċiviku b’saħħtu biex jiġu protetti d-drittijiet fundamentali 

Ewrobarometru Speċjali 568 “Il-protezzjoni u l-promozzjoni tad-demokrazija” 

Stqarrija għall-istampa: It-Tarka Ewropea għad-Demokrazija u l-Istrateġija tal-UE għas-Soċjetà Ċivili jwittu t-triq għal demokraziji aktar b’saħħithom u aktar reżiljenti