Mit-12 ta’ Awwissu 2026, fl-UE japplikaw regoli ġodda dwar l-imballaġġ u l-iskart mill-imballaġġ. Dan se jbiddel il-mod kif isir l-imballaġġ tal-prodotti biex jiġu protetti l-ambjent u s-saħħa tan-nies. Dan se joħloq opportunitajiet għan-negozji wkoll.
L-imballaġġ juża kwantitajiet kbar ta’ materja prima u jiġġenera skart li jispiċċa fil-landfills jew fil-baħar. Xi sustanzi kimiċi li jintużaw fl-imballaġġ jistgħu jagħmlu l-ħsara wkoll. Ir-regoli l-ġodda jindirizzaw dawn il-kwistjonijiet billi jistabbilixxu rekwiżiti għall-manifattura u għall-kompożizzjoni tal-imballaġġ kollu li jitqiegħed fis-suq tal-UE. Jeħtieġu wkoll li l-imballaġġ ikun jista’ jerġa’ jintuża jew ikun jista’ jiġi rkuprat, li jfisser li jista’ jintuża mill-ġdid jew jinbidel f’xi ħaġa oħra wara l-użu. Mill-2030, ċertu imballaġġ li jintuża darba biss se jiġi pprojbit meta jkunu disponibbli alternattivi iktar sostenibbli, bħal pakketti żgħar tal-ketchup jew fliexken żgħar tax-xampù fil-lukandi.
Il-miżuri l-ġodda se jwasslu biex l-imballaġġ
- jiġġenera inqas skart: l-imballaġġ tal-plastik irid parzjalment ikun magħmul minn kontenut rriċiklat, b’miri li kulma jmur jiżdiedu għall-2030 u għall-2040
- ikun kompletament riċiklabbli: l-imballaġġ kollu jrid ikun riċiklabbli sal-2030, biex wara l-komponenti tiegħu jkunu jistgħu jintużaw għal xi ħaġa oħra
- ikun ittikkettat b’mod ċar: it-tikketti ċari u l-kuluri jagħmluha iktar faċli biex wieħed jissepara l-iskart għar-riċiklaġġ — billi juru minn xiex inhu magħmul, fejn għandu jintrema, u kif għandu jiġi rritornat għall-użu mill-ġdid
- ikun iktar intelliġenti: l-imballaġġ mhux neċessarju u l-ispazju vojt fil-kunsinni jitnaqqsu
- ikun iktar faċli li jintuża mill-ġdid, li jimtela mill-ġdid u li jinġabar: is-sistemi tad-depożitu u tar-ritorn se jingħataw spinta. Il-kumpaniji jridu jagħmlu l-opzjonijiet tal-użu mill-ġdid jew tal-mili mill-ġdid disponibbli kull meta jkun possibbli, mingħajr tariffa addizzjonali
- ikun iktar ekwu u iktar sikur: id-ditti li jużaw materjali mhux riċiklabbli jew li jagħmlu ħsara lill-ambjent se jkollhom iħallsu biex jitnaddfu. Is-sustanzi kimiċi li jagħmlu l-ħsara u li jikkawżaw il-kanċer (PFAS) “għal dejjem” se jkunu ristretti fl-imballaġġ tal-ikel
L-UE qed taħdem biex tipproteġi u ttejjeb l-ambjent u tibni ekonomija iktar ċirkolari, sostenibbli u kompetittiva. Il-liġi dwar l-imballaġġ tindirizza l-isfidi ambjentali kkawżati mill-iskart mill-imballaġġ, tarmonizza r-regoli għan-negozji fis-suq uniku kollu, u toħloq opportunitajiet għan-negozji involuti fir-riċiklaġġ u fis-soluzzjonijiet tal-imballaġġ sostenibbli.
Għal iktar informazzjoni
Ir-Regolament dwar l-iskart mill-imballaġġ – skeda informattiva
- Data tal-pubblikazzjoni
- 12 Awwissu 2026
- Awtur
- Id-Direttorat Ġenerali għall-Komunikazzjoni