Ceiliúradh a dhéanamh ar Natura 2000: fiadhúlra agus gnáthóga na hEorpa a chosaint

An raibh a fhios agat go bhfuil an líonra is mó ar domhan de limistéir faoi chosaint comhshaoil lonnaithe san Eoraip? Os cionn 27,000 láithreán dúlra a chosnaítear le dlíthe an Aontais a dhéanann líonra Natura 2000! 

Gach bliain an 21 Bealtaine déanaimid ceiliúradh ar Lá Natura 2000, nuair a tharraingímid aird ar a bhfuil á dhéanamh chun na speicis agus na gnáthóga is luachmhaire agus is mó atá faoi bhagairt san Aontas a chosaint.

Clúdaíonn láithreáin Natura 2000 beagnach an cúigiú cuid de thalamh an Aontais agus an deichiú cuid de na farraigí máguaird. Is achar é sin atá nach mór ar an méid céanna leis an Spáinn agus an Iodáil le chéile. Cruthaíodh Natura 2000 leis an Treoir maidir le hÉin agus an Treoir maidir le Gnáthóga in 1992, agus tá athrú ó bhonn déanta aige ar an gcaoi a mbainistítear limistéir faoi chosaint ar fud an Aontais. 

Tá thart ar 1200 speiceas neamhchoitianta agus faoi bhagairt agus 230 cineál gnáthóige faoi chosaint a bhuí leis an líonra. Cuidíonn sé chun seirbhísí ríthábhachtacha a chur ar fáil, cuir i gcás fionnuisce, feithidí pailnitheacha agus cosaint ar thuilte agus ar chreimeadh cósta, agus tacaíonn sé le thart ar 4.4 milliún post ag an am céanna.

Ar ndóigh, tá go leor fós le déanamh chun ár mbithéagsúlacht a chosaint. Idir an dá linn, tá neart bealaí ann freisin chun tuilleadh a fhoghlaim faoi Natura 2000 agus faoin gcaoi a bhfuil difear á dhéanamh aige. Mar shampla, is féidir leat eolas a fháil faoi na láithreáin faoi chosaint i ngiorracht duit ach ceist a chur ar Flora. Nó is féidir leat breathnú ar léarscáil idirghníomhach líonra Natura 2000.

Is féidir leat páirt a ghlacadh in Bioblitz na bliana seo, a bheidh ar siúl idir an 17 agus an 25 Bealtaine. Seo an deis atá agat cur leis an eolaíocht trí pháirt a ghlacadh in iarracht chomhoibríoch chun an oiread speiceas plandaí, ainmhithe agus fungasach agus is féidir a aimsiú agus a shainaithint laistigh de Bioblitz limistéar Natura 2000 i ngiorracht duit. Faigh amach conas is féidir leat páirt a ghlacadh trí leathanach Lá Natura 2000 thíos. 

Tuilleadh eolais

Natura 2000 

Lá Natura 2000