An tsláinte dhomhanda a chur chun cinn: Cruinniú Mullaigh Gealltanais Gavi

chun tacú le himdhíonadh, slándáil sláinte agus rathúnas

Tá níos mó i gceist leis an imdhíonadh ná an tsláinte féin

Téann tionchar an imdhíonta níos faide ná an tsláinte – baineann sé le rathúnas, slándáil agus forbairt eacnamaíoch. Is tosaíocht dhomhanda é rochtain chothrom ar vacsaíní a chinntiú, agus tá ról ceannasach ag an Aontas Eorpach (AE) san iarracht sin.

In 2003 chuaigh an tAontas i gcomhar le Gavi, an Chomhghuaillíocht Vacsaíní, den chéad uair chun córais sláinte dhomhanda a neartú agus lean sé dá chomhar rathúil ó shin i leith.

Cruinniú Mullaigh Gealltanais Gavi 6.0

An 25 Meitheamh 2025 sa Bhruiséil, chomhóstáil an tAontas, in éineacht le Fondúireacht Gates, Cruinniú Mullaigh Gealltanais Ardleibhéil Gavi 6.0, le dlúth-thacaíocht ó dheontóirí Gavi agus ó thíortha cur chun feidhme eile. Tháinig an líon ceannairí domhanda ba mhó riamh le chéile ag an gcruinniú mullaigh ó rialtais, ó eagraíochtaí comhpháirtíochta, ó mhonaróirí vacsaíní, ón tsochaí shibhialta agus ón earnáil phríobháideach chun infheistíochtaí ríthábhachtacha i gcláir vacsaínithe a chinntiú.

Gheall deontóirí níos mó ná €7.7 billiún i dtreo spriocbhuiséad €10.2 billiún don tréimhse 2026-2030. San áireamh leis sin bhí gealltanas iomlán níos mó ná €2 bhilliún ó Team Europe – an tAontas agus a Bhallstáit – an deontóir is mó do Gavi i dteannta a chéile. Is é an Coimisiún Eorpach a gheall €360 milliún den mhéid sin.

Tugadh gealltanais bhreise, ina measc sin

maoiniú comhlántach €3.8 billiún ó institiúidí airgeadais forbartha
coigilteas costais suas le €170.6 milliún le haghaidh cláir a dtacaíonn Gavi leo a d’fhógair monaróirí vacsaíní
comhpháirtíochtaí san earnáil phríobháideach dar luach níos mó ná €127 milliún a dhíríonn ar imdhíonadh a chur i gcrích

Spriocanna Gavi 6.0 (2026-2030)

Is í straitéis 2026–2030 Gavi (Gavi 6.0) an iarracht deiridh chun spriocanna domhanda imdhíonta agus slándála sláinte a bhaint amach roimh 2030, an sprioc-am le haghaidh na Spriocanna Forbartha Inbhuanaithe.

Leagan téacs

500 milliún
is é sin líon na leanaí a vacsaíníodh
Níos mó ná 8 milliún
is é sin líon na mbeatha duine a sábháladh
€85.3 billiún
is é sin méid na dtairbhí eacnamaíocha measta

Le linn na tréimhse 2026-2030, is é is aidhm do Gavi an méid seo a leanas a dhéanamh:

cláir vacsaíní a leathnú agus infheistíocht a dhéanamh i stoc-chairn éigeandála chun galair a bhíonn i mbaol ráige a chosc ag an bhfoinse
rochtain ar vacsaíní a chinntiú do na tíortha is boichte ar domhan i ngéarchéim sláinte a d’fhéadfadh a bheith ann amach anseo
tacú le táirgeadh áitiúil vacsaíní trí chomhpháirtíochtaí réigiúnacha

An tAontas Eorpach agus Gavi

Tá comhpháirtíocht sheanbhunaithe ag an Aontas le Gavi. Tá breis agus €3.2 billiún tugtha aige ó 2003 i leith chun imdhíonadh domhanda a chur chun cinn. San áireamh leis sin tá tacaíocht shuntasach trí Cheanglas Réamhcheannaigh COVAX agus ionstraimí airgeadais an Bhainc Eorpaigh Infheistíochta, cuid de Fhreagairt Dhomhanda an Aontais ar an gCoróinvíreas.

Is é an tAontas agus a Bhallstáit i dteannta a chéile, i gcur chuige Team Europe, an ranníocóir is mó atá ag Gavi go fóill, agus níos mó ná €6.5 billiún tugtha acu le linn thréimhse straitéiseach Gavi 5.0 (2021-2025). I mí Mheán Fómhair 2024 d’fhógair an Coimisiún gealltanas maoiniúcháin nua €260 milliún le haghaidh na mblianta 2026–2027. Cuirfear na cistí le sprioc 2030 Gavi chun 500 milliún leanbh ar fud an domhain a chosaint, córais imdhíonta a neartú, agus borradh a chur faoin tslándáil sláinte dhomhanda trí ullmhacht a mhéadú chun freagairt ar ráigeanna galair.

Cuireann Cruinniú Mullaigh Gealltanais 2025 leis an seoladh rathúil a bhí ag Deis Infheistíochta Gavi 6.0 i mí an Mheithimh 2024 i bPáras, rud a rinne an Fhrainc agus an tAontas Afracach a chomhóstáil agus inar bailíodh $2.4 billiún i dtreo sprioc maoinithe Gavi $9 billiún.