Leanann Schengen de leas a dhéanamh 40 bliain tar éis a bhunaithe

Agus an tAontas Eorpach ag ullmhú chun 40 bliain de Schengen a cheiliúradh, d’fhoilsigh an Coimisiún a thuarascáil bhliantúil ar staid Schengen. Déantar athbhreithniú sa tuarascáil ar an méid a baineadh amach, ar na dúshláin agus ar na forbairtí i limistéar Schengen le bliain anuas.

Léirítear sa tuarascáil go bhfuil rialacha Schengen á gcur i bhfeidhm go maith agus go bhfuil laghdú tagtha ar thrasnuithe neamhrialta ag a theorainneacha seachtracha mar thoradh ar iarrachtaí treisithe an Aontais. Leagtar béim ann freisin ar cheanglais Schengen a bheith ina ngné ríthábhachtach de phróiseas méadaithe an Aontais. 

Ag tús 2025, thug an Bhulgáir agus an Rómáin a n-aontachas iomlán le limistéar Schengen chun críche. Luaitear sa tuarascáil an dóigh ar neartaigh an méid sin geilleagar an Aontais agus léirítear go bhfuil tíortha an Aontais tiomanta oibriú le chéile faoi Schengen.

Ag féachaint chun cinn, ní mór tuilleadh oibre a dhéanamh chun an méid seo a leanas a dhéanamh:

• feabhas a chur ar an gcomhar idir na tíortha ar comhaltaí Schengen iad agus gníomhaíocht laistigh den limistéar a chomhordú, trí eolas a chomhroinnt go tapa agus go héifeachtach
• dlús a chur le cur chun feidhme na n-uirlisí digiteacha, amhail an córas dul isteach/imeachta atá le teacht agus an Córas Eorpach um Fhaisnéis agus Údarú Taistil (ETIAS)
• dul in oiriúint don tírdhreach slándála atá ag teacht chun cinn
• ullmhacht a chinntiú i bhfad níos faide ná ár dteorainneacha, tríd an gcaidreamh a dhoimhniú le tíortha comhpháirtíochta
• bearta éifeachtacha a chur i bhfeidhm chun daoine a fhilleadh nach bhfuil aon cheart dlíthiúil acu fanacht san Aontas

Tá Schengen ar cheann de na scéalta ratha is mó atá ag an Aontas Eorpach. Is é cnámh droma mhargadh inmheánach an Aontais é agus éascaíonn sé saol beagnach 450 milliún duine. Tá meastóireacht á déanamh ag an gCoimisiún ar staid Schengen gach bliain ó bhí 2022 ann. Cuidíonn torthaí na tuarascála le tíortha an Aontais cinneadh a dhéanamh maidir leis an méid is gá dóibh a chur in ord tosaíochta sa bhliain atá le teacht, rud a chinntíonn go leanfaidh Schengen de bheith ag forbairt agus ag oiriúnú do na hathraithe sa saol. 

Tuilleadh eolais

Preaseisiúint: An ceathrú tuarascáil ar staid Schengen maidir le 40 bliain de thairbhí móra do shaoránaigh uile an Aontais

Tuarascáil ar staid Schengen 

ProtectEU – Straitéis Eorpach um an tSlándáil Inmheánach