L-UE tiffoka l-isforzi tagħha fuq il-ġlieda kontra t-traffikar tal-armi tan-nar illeċiti

L-armi tan-nar illeċiti joħolqu riskju serju għas-sikurezza pubblika, filwaqt li jqanqlu t-terroriżmu, il-kriminalità organizzata, il-vjolenza minn gruppi organizzati, u reati serji oħrajn. Fl-UE, bħalissa huwa diffiċli li niġġieldu kontra t-traffikar tal-armi tan-nar, peress li r-regoli attwali tal-UE jkopru biss is-sjieda legali u t-trasferiment tal-armi tan-nar. Hemm ukoll differenzi sinifikanti fil-mod kif ir-reati relatati mal-armi tan-nar jiġu definiti u kkastigati f’pajjiżi differenti. Huwa għalhekk li l-Kummissjoni pproponiet regoli ġodda għall-UE kollha biex jiġu indirizzati b’mod effettiv it-traffikar u reati oħrajn relatati mal-armi tan-nar.

Il-proposta se tgħin biex jiġu armonizzati r-regoli u l-isforzi madwar il-pajjiżi tal-UE u titjieb l-effettività tal-infurzar tal-liġi kontra reati relatati mal-armi tan-nar billi

• iddaħħal definizzjonijiet komuni, fil-livell tal-UE, tar-reati u l-pieni b’rabta mal-armi tan-nar — li jkopru l-aspetti kollha, mit-traffikar, sal-falsifikazzjoni tal-marki obbligatorji, sal-użu illeċitu ta’ mudelli għall-istampar bit-3D tal-armi tan-nar
• tagħti sostenn għal kooperazzjoni aktar b’saħħitha bejn il-pajjiżi tal-UE — kull pajjiż se jkollu jistabbilixxi Punt Fokali Nazzjonali dwar l-Armi tan-Nar biex jikkoordina din il-kooperazzjoni transfruntiera
• ittejjeb il-ġbir u l-użu tad-data — inkluż l-istabbiliment ta’ sett ta’ data għar-reġistrazzjoni tal-armi tan-nar issekwestrati, u l-ħtieġa li l-pajjiżi tal-UE jiġbru u jikkondividu data relatata ma’ reati tal-armi tan-nar kull ħames snin.

Din il-proposta l-ġdida hija l-ewwel waħda li ġiet adottata fl-ambitu tal-istrateġija Ewropea għas-sigurtà interna, il-ProtectEU. Bis-saħħa tagħha, l-investigazzjonijiet u l-prosekuzzjonijiet se jsiru aktar effettivi u l-kapaċità tal-infurzaturi tal-liġi li jirrispondu għal theddid emerġenti se tissaħħaħ, u dan min-naħa tiegħu se jikkontribwixxi għal protezzjoni akbar għaċ-ċittadini. 

Għal aktar tagħrif

Stqarrija għall-istampa — Il-Kummissjoni tipproponi regoli fil-livell tal-UE kontra t-traffikar tal-armi tan-nar illeċiti

Skeda informattiva

It-traffikar tal-armi tan-nar