Niċċelebraw ix-Xahar Ewropew tad-Diversità

Kull Mejju mill-2020, l-Unjoni Ewropea tiċċelebra x-Xahar Ewropew tad-Diversità biex tippromwovi l-isforzi fil-bini ta’ ambjenti ugwali u inklużivi għall-benefiċċju ta’ kulħadd. Skont studju tal-2023, aktar minn nofs dawk li wieġbu jqisu d-diskriminazzjoni bħala mifruxa f’pajjiżhom. 21% ta’ dawk li wieġbu ħassewhom ukoll diskriminati jew esperjenzaw fastidju f’din l-aħħar sena.

Matul ix-Xahar Ewropew tad-Diversità, il-Kummissjoni tappella lill-kumpaniji u lill-organizzazzjonijiet biex jixħtu dawl fuq l-importanza tad-diversità u l-inklużjoni fuq il-post tax-xogħol u fis-soċjetà billi jorganizzaw sensiela ta’ avvenimenti u attivitajiet. Huma ppjanati aktar minn 50 avveniment matul il-ġimgħat li ġejjin.  

Ix-Xahar Ewropew tad-Diversità ta’ din is-sena tnieda uffiċjalment f’ċerimonja fil-25 ta’ April, li matulha bliet u muniċipalitajiet fil-Kroazja, fl-Italja, fis-Slovenja, fi Spanja u fl-Iżvezja rebħu l-Premjijiet Kapitali Ewropej tal-Inklużjoni u d-Diversità. Il-Premjijiet jirrikonoxxu l-ħidma li saret minn bliet, irħula jew reġjuni fl-Unjoni Ewropea għall-promozzjoni tal-inklużjoni u l-ħolqien ta’ soċjetajiet ħielsa mid-diskriminazzjoni. Il-Premju tad-deheb għall-awtoritajiet lokali b’aktar minn 50,000 abitant ingħata lil Zagreb fil-Kroazja. Il-premju tad-deheb għal inqas minn 50,000 abitant ingħata lil Corbetta fl-Italja, li rebaħ ukoll il-premju tal-għażla pubblika.

L-ugwaljanza tinsab fil-qalba tal-aġenda tal-Kummissjoni. Din qed taħdem biex tibni soċjetà inklużiva u Unjoni vera ta’ Ugwaljanza. Il-Kummissjoni adottat ħames strateġiji u azzjonijiet immirati li jiggwidaw il-ħidma tagħha fl-oqsma tal-LGBTIQ, l-ugwaljanza bejn il-ġeneri, id-drittijiet tal-persuni b’diżabbiltà, il-ġlieda kontra r-razziżmu u l-ugwaljanza, l-inklużjoni u l-parteċipazzjoni tar-Rom.

Għal aktar informazzjoni

Ix-Xahar Ewropew tad-Diversità 2024

Irreġistra issa l-attività tiegħek tax-Xahar Ewropew tad-Diversità

Ugwaljanza u inklużjoni

Stqarrija għall-istampa: Ix-Xahar tad-Diversità tal-UE jibda bir-rebbieħa tal-Premjijiet tal-Bliet Kapitali Ewropej tal-Inklużjoni u d-Diversità tal-2024

L-istħarriġ tal-Ewrobarometru: Id-Diskriminazzjoni fl-Unjoni Ewropea