Borradh a chur faoi neamhspleáchas fuinnimh an Aontais agus costais a laghdú

Tá tionscnaimh curtha i láthair ag an gCoimisiún Eorpach chun borradh a chur faoin infheistíocht i réitigh fuinnimh ghlain de thionscnamh an Aontais, chun athléimneacht a mhéadú, agus chun praghsanna fuinnimh a laghdú. 

Cuireann an comhthéacs geopholaitiúil atá ann faoi láthair i dtábhacht na rioscaí a bhaineann le spleáchas na hEorpa ar bhreoslaí iontaise iompórtáilte. Tá imní ar shaoránaigh agus ar thionscail, agus údar acu, faoi phraghsanna arda fuinnimh. An réiteach meántéarma is inacmhainne agus is iontaofa atá ann ná infheistíocht a dhéanamh san fhuinneamh glan.

Fuinneamh níos saoire do shaoránaigh an Aontais

Le pacáiste fuinnimh na saoránach, cuirtear na daoine i lár an aonaigh agus tacaítear leis na daoine is leochailí. Déanfar an méid seo a leanas leis an bpacáiste: 

• cuidiú chun billí fuinnimh a laghdú
• saoránaigh a chumhachtú chun a bhfuinneamh glan féin a tháirgeadh agus a chomhroinnt
• bochtaineacht fuinnimh a chomhrac

Rachaidh an méid seo a leanas chun leas na dtomhaltóirí freisin: 

• aistriú níos gasta idir soláthróirí
• cánacha agus tobhaigh níos ísle ar bhillí leictreachais
• eolas níos trédhearcaí maidir le billí agus conarthaí fuinnimh

An leas is fearr is féidir a bhaint as foinsí fuinnimh na hEorpa

Ní mór don Eoraip athrú a dhéanamh ar a córas fuinnimh agus ar a bonneagar fuinnimh freisin. Cuideoidh an straitéis infheistíochta um fhuinneamh glan an méid seo a leanas: 

• an bhearna a dhúnadh idir an caipiteal príobháideach atá ar fáil agus na hinfheistíochtaí atá de dhíth
• maoiniú príobháideach a shlógadh le haghaidh eangach, teicneolaíochtaí nuálacha fuinnimh ghlain agus éifeachtúlacht fuinnimh

Cuirfidh an Coimisiún an straitéis sin i gcrích le Grúpa an Bhainc Eorpaigh Infheistíochta, a bhfuil sé beartaithe aige maoiniú os cionn €75 bhilliún a chur ar fáil sna 3 bliana amach romhainn chun tacú leis an aistriú i dtreo fuinneamh glan. 

Teicneolaíochtaí fuinnimh ghlain de thionscnamh an Aontais le haghaidh fuinneamh iontaofa inacmhainne

Tá sé ríthábhachtach acmhainneacht na hEorpa a neartú agus slabhraí soláthair láidre a fhorbairt le haghaidh teicneolaíochtaí glan-nialasachta chun spleáchais ar iompórtálacha a laghdú agus uathriail straitéiseach a chinntiú. Cuideoidh an straitéis um imoibreoirí modúlacha beaga (IMBanna) leis na tíortha den Aontas na chéad IMBanna oibríochtúla a chur in úsáid go luath sna 2030í. Tacóidh sé freisin leis an tionscal dlús a chur le forbairt agus imscaradh na n-imoibreoirí. Breithneoidh an Coimisiún breisiú €200 milliún ó InvestEU chun tacú le haonaid tráchtála tosaigh de theicneolaíochtaí núicléacha nuálacha a chur in úsáid trí ráthaíochtaí dí-rioscaithe. 

Tá slabhra soláthair Eorpach solúbtha ríthábhachtach chun an méid seo a leanas a dhéanamh:

• ceannaireacht theicneolaíoch agus thionsclaíoch a chinntiú
• oibrithe oilte a fhorbairt
• an comhar rialála a neartú
• na caighdeáin sábháilteachta is airde a chinntiú

Cuireann na bearta atá beartaithe leis an bplean gníomhaíochta um fhuinneamh inacmhainne. Is é is aidhm dóibh iomaíochas na hEorpa a neartú, spleáchais fuinnimh a laghdú agus costais fuinnimh do theaghlaigh a laghdú. Leanfaidh an Coimisiún de bhearta breise a chur i láthair chun slándáil agus inacmhainneacht fuinnimh na hEorpa a fheabhsú a thuilleadh.

Tuilleadh eolais

Preaseisiúint

Bileog eolais

Ceisteanna agus freagraí maidir leis an straitéis infheistíochta um fhuinneamh glan

Ceisteanna agus freagraí maidir leis an straitéis IMB

Fuinneamh inacmhainne

Pacáiste um na hEangacha Eorpacha

Iomaíochas