L-UE fil-COP

Sommarju

L-UE tipparteċipa fil-Konferenza tal-Partijiet (COP) tan-NU għall-UNFCC kull sena. F’konferenzi preċedenti, l-UE kkontribwiet biex jiġu definiti t-tappi, il-miri u l-ftehimiet ewlenin b’rabta mal-mitigazzjoni tat-tibdil fil-klima.

Dwar il-konferenza

Bħala parti mill-isforzi tagħha favur in-newtralità klimatika dinjija, il-Kummissjoni Ewropea tieħu sehem fil-Konferenza tal-Partijiet (COP) tal-Konvenzjoni Qafas tan-NU dwar it-Tibdil fil-Klima. Il-Konferenzi tan-Nazzjonijiet Uniti dwar it-Tibdil fil-Klima ilhom mill-1995 ilaqqgħu lill-partijiet flimkien biex iħaffu l-azzjoni favur l-għanijiet tal-Ftehim ta’ Pariġi u l-Konvenzjoni Qafas tan-NU dwar it-Tibdil fil-Klima.

Il-kontribut tal-UE fil-COP

L-UE tipparteċipa fil-COP kull sena, u taqdi rwol ewlieni fit-tiswir tal-azzjoni klimatika dinjija. Matul is-snin, l-UE kkontribwiet għal tappi u ftehimiet ewlenin, fosthom biex

l-emissjonijiet tal-gassijiet serra jonqsu bi 43% sal-2030,
titħaffef it-tranżizzjoni lil hinn mill-fjuwils fossili tul dan id-deċennju,
in-niġġiesa ewlenin jitħeġġu jistabbilixxu miri ġodda għat-tnaqqis tal-emissjonijiet,
jinħolqu fondi ġodda biex jgħinu lill-pajjiżi li qed jiżviluppaw li qed jintlaqtu b’mod partikolari mit-tibdil fil-klima, u
jiġu proposti regoli ġodda li jixprunaw is-swieq internazzjonali tal-karbonju

L-UE tibqa’ impenjata favur il-miri tagħha tan-newtralità klimatika u li tilħaq l-objettivi tal-Ftehim ta’ Pariġi.

Il-COP31 f’Antalya, it-Turkija

Il-31 Konferenza tan-NU dwar it-Tibdil fil-Klima (COP31) se ssir mid-9 sal-20 ta’ Novembru 2026 f’Antalya, it-Turkija.

Din se tlaqqa’ lill-Partijiet flimkien biex javvanzaw l-azzjoni klimatika u jaħdmu favur miri klimatiċi fit-tul.

Fost il-prijoritajiet tal-COP31 hemm l-elettrifikazzjoni, l-iskart żero, is-sigurtà tal-ikel, il-bliet reżiljenti, l-industrijalizzazzjoni ekoloġika, il-parteċipazzjoni taż-żgħażagħ, is-saħħa u l-edukazzjoni.

Ara l-aġenda tal-COP31