Is-sajf magħna, u wasal iż-żmien li noħorġu l-malji. Fl-Ewropa ssib bosta bajjiet u lagi fejn tista’ tmur. Skont l-aħħar rapport tal-UE dwar l-ilma għall-għawm, il-biċċa l-kbira tal-ilmijiet jilħqu standards “eċċellenti” – aħbar tajba għal dawk li jħobbu l-għawm.
Mit-22,200 sit tal-għawm fl-Ewropa li ġew immonitorjati, madwar 85% jilħqu l-istandard għoli “eċċellenti”, filwaqt li 96% tas-siti kollha mmonitorjati fl-UE jilħqu l-istandard minimu ta’ kwalità. 1.5% biss huma kklassifikati bħala ta’ kwalità “fqira”.
L-Awstrija, il-Bulgarija, Ċipru u l-Greċja għandhom l-ogħla proporzjon ta’ ilmijiet għall-għawm ta’ kwalità eċċellenti. Ix-xmajjar u l-lagi għandhom rata kemxejn aktar baxxa ta’ ilma għall-għawm “eċċellenti” (78%) meta mqabbla mal-ilmijiet kostali (88%).
Din il-kwalità għolja tal-ilmijiet għall-għawm fl-Ewropa ġejja l-aktar mill-impatt sostnut tal-liġijiet tal-UE dwar il-kwalità tal-ilma. Dan jinkludi:
- prattiki mtejba ta’ monitoraġġ u ġestjoni
- investiment f’impjanti tat-trattament tal-ilma mormi urban
- ġbir aħjar tal-ilma mormi
- valutazzjoni mtejba ta’ ċerti algi li huma ta’ ħsara għas-saħħa tal-bniedem u għan-natura
Bis-saħħa ta’ dawn l-isforzi kontinwi, illum in-nies jistgħu jgħumu f’ħafna ilmijiet u xmajjar urbani li qabel kienu mniġġsa ħafna.
Jekk tixtieq tara fejn l-aħjar tgħum dan is-sajf, l-Aġenzija Ewropea għall-Ambjent ħejjiet mappa interattiva li tindika s-siti tal-għawm l-aktar sikuri fl-Ewropa.
Mur aqbeż qabża!
Għal aktar informazzjoni
Ir-rapport tal-UE dwar l-ilma għall-għawm
Mappa interattiva tas-siti tal-għawm l-aktar sikuri fl-Ewropa
Stqarrija għall-istampa: L-ilmijiet għall-għawm fl-Ewropa huma sikuri għall-għawm
- Data tal-pubblikazzjoni
- 19 Ġunju 2026
- Awtur
- Id-Direttorat Ġenerali għall-Komunikazzjoni