Poist, fuinneamh agus slándáil a fheabhsú leis an gComhshocrú don Mheánmhuir

Tá Comhshocrú don Mheánmhuir leagtha amach ag an gCoimisiún Eorpach agus ag an Ardionadaí lena gcuirfear dlús leis an gcomhar agus leis an nasc eacnamaíoch ar fud na Meánmhara. Cuireann an Comhshocrú le naisc stairiúla chultúrtha agus leis an obair a rinne an tAontas roimhe seo sa réigiún chun spás coiteann don Mheánmhuir a chruthú atá nasctha rathúil athléimneach slán. 

Is é an sprioc atá ann tairbhí frithpháirteacha a chruthú, idir fhuinneamh glan a tháirgeadh agus infheistíocht phríobháideach a scaoileadh. Cuideoidh an méid sin chun tionscadail réigiúnacha ar scála mór a spreagadh lena gcruthófar deiseanna do dhaoine agus do ghnólachtaí, agus béim ar leith á leagan ar an óige, ar mhná agus ar ghnólachtaí beaga. 

Is ar thrí réimse comhair a oibreoidh an tAontas lena chomhpháirtithe sa Mheánmhuir Theas: 

• daoine ina gceann feadhna  
  • ardoideachas agus gairmoiliúint a chur chun cinn trí Ollscoil na Meánmhara a bhunú agus trí chláir theicniúla agus ghairme atá ann cheana a uas-scálú
  • scileanna agus poist a fhorbairt, agus tionscnaimh a chur i bhfeidhm i réimse na soghluaisteachta, an chultúir, na turasóireachta agus an spóirt, agus béim láidir á leagan ar an óige.
• geilleagair atá níos láidre, níos inbhuanaithe agus níos comhtháite
  • borradh a chur faoin bhfuinneamh agus faoi theicneolaíochtaí glana   
  • slabhraí soláthair breise a chomhtháthú, ina measc sin sna hearnálacha sláinte agus talmhaíochta, agus in amhábhair chriticiúla
  • feabhas a chur ar bhonneagair dhigiteacha a thugann geilleagair agus saoránaigh níos gaire dá chéile  
  • cuidiú chun geilleagar gorm níos inbhuanaithe a thógáil in imchuach na Meánmhara.
• an tslándáil, an ullmhacht agus bainistiú imirce
  • tionscnaimh a sheoladh maidir le hullmhacht agus athléimneacht na Meánmhara i leith tubaistí
  • cur chuige cuimsitheach a chur chun cinn maidir le bainistiú imirce  
  • fóram réigiúnach a bhunú don Aontas agus do thíortha na Meánmhara Theas maidir leis an tsíocháin agus an tslándáil.

Tá an Comhshocrú oscailte freisin don rannpháirtíocht le comhpháirtithe lasmuigh den Mheánmhuir Theas, ina measc sin an Mhurascaill, an Afraic Fho-Shahárach, na Balcáin Thiar agus an Tuirc. 

Táthar ag súil le formhuiniú polaitiúil ó na comhpháirtithe uile i mí na Samhna 2025. A luaithe a fhormheasfar an Comhshocrú, déanfar é a fhíorú trí Phlean Gníomhaíochta tiomnaithe. 

Tuilleadh eolais 

Eoraip dhomhanda: ár gcumhacht agus ár gcomhpháirtíochtaí a ghiaráil 

Preaseisiúint: Comhshocrú don Mheánmhuir – Aon Mhuir Amháin, Aon Chomhshocrú Amháin, Aon Todhchaí Amháin – uaillmhian chomhroinnte don réigiún