An 9 Bealtaine déantar Lá na hEorpa a cheiliúradh. Is comóradh é ar Dhearbhú Schuman, inar mhol Aire Gnóthaí Eachtracha na Fraince, Robert Schuman, go gcruthófaí Comhphobal Eorpach do Ghual agus Cruach. Ba é an togra sin an chéad chéim i dtreo lánpháirtiú na hEorpa. In 1950, agus tíortha na hEorpa fós ag téarnamh ó léirscrios an Dara Cogadh Domhanda, d’fhorbair grúpa polaiteoirí Eorpacha fís d’Eoraip aontaithe chun tuilleadh coinbhleachtaí a chosc. Bhí sé d’aidhm ag plean Schuman, a forbraíodh i gcomhar le Jean Monnet, an tsíocháin agus an dlúthpháirtíocht a chothú trí thionscail ghuail agus chruach Iarthar na hEorpa a chomhtháthú. Mar thoradh air sin, cruthaíodh an Comhphobal Eorpach do Ghual agus Cruach in 1952, lenar tugadh le chéile an Ghearmáin, an Fhrainc, an Iodáil, an Ísiltír, an Bheilg agus Lucsamburg faoi chomhbhainistiú a bpríomhthionscal. Sna blianta ina dhiaidh sin, leathnaíodh an comhar i measc chomhaltaí bunaidh an Chomhphobail do Ghual agus Cruach chun go leor réimsí eile a chlúdach, rud as ar tháinig Aontas Eorpach an lae inniu ina bhfuil 27 mBallstát. Le linn na tréimhse sin, cliseadh ar an gcumannachas agus ar dheachtóirí ar an mór-roinn seo againne, agus tógadh agus thit Balla Bheirlín. Chonacthas freisin cuid de na héachtaí is mó atá bainte amach ag an Aontas, cuir i gcás bunú an Mhargaidh Aonair, clár Erasmus, limistéar saorthaistil Schengen, agus an Euro. I mbliana, ní hamháin go bhfuilimid ag comóradh gach rud atá bainte amach againn agus atá tógtha againn le chéile, ach táimid freisin ag ceiliúradh 40 bliain ó tháinig an Phortaingéil agus an Spáinn isteach san Aontas, chomh maith le comóradh 40 bliain ar an gcéad cheiliúradh oifigiúil ar Lá na hEorpa agus úsáid phoiblí bhratach agus aintiún an Aontais.Is deis é Lá na hEorpa chun ár gcomhluachanna a cheiliúradh, teagmháil a dhéanamh leis na saoránaigh, agus a thaispeáint conas a thugann an tAontas cosaint do dhaoine, conas a chruthaíonn sé deiseanna agus conas a chuireann sé comhpháirtíochtaí domhanda chun cinn. Mar chuid den chomóradh osclóidh na hinstitiúidí Eorpacha a ndoirse do gach saoránach agus eagróidh siad gníomhaíochtaí éagsúla ar líne agus ar an láthair sa Bhruiséil agus ar fud an Aontais. Cuirtear na gníomhaíochtaí go léir ar fáil saor in aisce, agus ní gá clárú dóibh. Glac páirt sa cheiliúradh!Tuilleadh eolaisCuairt a thabhairt ar an gCoimisiún Eorpach an 9 Bealtaine 2026Imeachtaí Lá na hEorpaRobert Schuman: ailtire thionscadal lánpháirtíochta na hEorpa Sonraí Dáta foilsithe8 Bealtaine 2026ÚdarArd-Stiúrthóireacht na Cumarsáide
