Miżuri ġodda biex jissaħħu r-reżiljenza u l-kapaċitajiet taċ-ċibersigurtà

Aħna nqattgħu ħafna mill-ħin tagħna online. Din il-bidla lejn id-dinja diġitali ġġib magħha theddid kif ukoll opportunitajiet. Din tinkludi attakki ċibernetiċi u ibridi fuq servizzi essenzjali u istituzzjonijiet demokratiċi, li l-Ewropa tiffaċċja kuljum. Il-Kummissjoni pproponiet miżuri ġodda taċ-ċibersigurtà biex tkompli ssaħħaħ ir-reżiljenza u l-kapaċitajiet tal-UE fid-dawl ta’ dan it-theddid dejjem akbar.

Il-Kummissjoni pproponiet li tirrevedi l-Att dwar iċ-Ċibersigurtà tal-2019, li jistabbilixxi l-qafas għaċ-ċertifikazzjoni taċ-ċibersigurtà fl-UE kollha tal-prodotti, tas-servizzi u tal-proċessi diġitali. Din ir-reviżjoni għandha l-għan li

• tissaħħaħ is-sigurtà tal-ktajjen tal-provvista tat-teknoloġiji tal-informazzjoni u tal-komunikazzjoni tal-UE, billi jitnaqqsu r-riskji minn fornituri ta’ pajjiżi terzi li jqajmu tħassib dwar iċ-ċibersigurtà
• tiżgura li l-prodotti u s-servizzi diġitali użati miċ-ċittadini tal-UE jiġu ttestjati għas-sigurtà b’mod aktar effiċjenti, billi tiċċara r-regoli u tissimplifika l-proċeduri skont il-Qafas Ewropew taċ-Ċertifikazzjoni taċ-Ċibersigurtà

Lil hinn mir-reviżjoni tal-Att dwar iċ-Ċibersigurtà, il-miżuri jinkludu passi addizzjonali biex

• tagħmilha aktar faċli għall-kumpaniji biex isegwu r-regoli taċ-ċibersigurtà billi jiġu ssimplifikati r-regoli ġuriżdizzjonali u jiġi ssimplifikat il-ġbir tad-data dwar l-attakki tar-ransomware
• issaħħaħ l-Aġenzija tal-UE għaċ-Ċibersigurtà (ENISA) sabiex tkun tista’ tappoġġa aħjar lill-pajjiżi tal-UE fil-fehim, fit-tħejjija u fir-rispons għal theddid komuni

Issa dawn il-proposti se jiġu diskussi mill-Parlament Ewropew u l-Kunsill tal-UE. Hekk kif jiġu approvati, dawn jistgħu jiġu applikati fl-UE kollha.

Għal aktar tagħrif

Stqarrija għall-istampa - Il-Kummissjoni ssaħħaħ ir-reżiljenza u l-kapaċitajiet taċ-ċibersigurtà tal-UE

Iċ-ċibersigurtà tal-UE

Att Rivedut dwar iċ-Ċibersigurtà