Ní mór dul chun cinn níos tapúla a dhéanamh chun uiscí na hEorpa a chosaint agus rioscaí tuilte a bhainistiú ar bhealach níos fearr

Is é uisce glan fórsa tiomána na beatha. Is acmhainn riachtanach do dhaoine agus don dúlra é agus chun an aeráid a rialú. Fós féin, de réir tuarascálacha nua a d’fhoilsigh an Coimisiún Eorpach maidir le staid an uisce san Aontas, cé go bhfuil dul chun cinn déanta chun feabhas a chur ar dhobharlaigh an Aontais le sé bliana anuas, tá gá le tuilleadh gníomhaíochta. 

Bhí roinnt treochtaí dearfacha ann mar thoradh ar chur i bhfeidhm na Treorach Réime maidir le hUisce, agus leanann dobharlaigh screamhuisce de stádas maith cainníochtúil agus ceimiceach a bhaint amach. Mar sin féin, tá gá le hobair chun spriocanna an Aontais maidir le cáilíocht agus cainníocht fionnuisce a bhaint amach. Níl stádas maith éiceolaíoch á bhaint amach ach ag 39.5% de dhobharlaigh uisce dromchla an Aontais, agus níl stádas maith ceimiceach á bhaint amach ach ag 26.8% díobh. Tá príomh-mholtaí curtha faoi bhráid na mBallstát ag an Aontas chun feabhas a chur ar bhainistiú uisce faoi 2027.

Maidir le bainistiú riosca tuilte, aithníonn an Coimisiún na feabhsuithe suntasacha atá déanta go dtí seo, ach cuireann sé i dtábhacht arís gur gá do thíortha an Aontais níos mó a dhéanamh chun a gcumas pleanála agus riaracháin a leathnú agus infheistíocht leordhóthanach a dhéanamh i gcosc tuilte, go háirithe i bhfianaise na dtuilte níos minice agus níos déine atá ag tarlú sa lá atá inniu ann. Fuarthas amach sa tuarascáil ar an Treoir Réime um Straitéis Mhuirí freisin go bhféadfaí feabhas suntasach a dhéanamh, go háirithe maidir le dea-stádas comhshaoil a bhaint amach d’uiscí muirí uile an Aontais.

Cumhdaítear sna tuarascálacha sin cur chun feidhme trí phríomhphíosa de reachtaíocht uisce an Aontais: an Treoir Réime maidir le hUisce, an Treoir maidir le Tuilte, agus an Treoir Réime um Straitéis Mhuirí. 

Ag gabháil leis na tuarascálacha, sheol an Coimisiún glao ar fhianaise lena n-iarrtar ar pháirtithe leasmhara éagsúla ionchur a roinnt agus cuidiú le dearadh na Straitéise Eorpaí maidir le hAthléimneacht i Réimse an Uisce a bheidh ann amach anseo.

Tuilleadh eolais

Preaseisiúint: Léirítear i dtuarascálacha ón gCoimisiún go bhfuil gá le dul chun cinn níos tapúla ar fud na hEorpa chun uiscí a chosaint agus rioscaí tuilte a bhainistiú ar bhealach níos fearr

Tuarascálacha ar chur chun feidhme na Treorach Réime maidir le hUisce agus na Treorach maidir le Tuilte - suíomh gréasáin

Measúnú 2024 ar chláir beart faoin Treoir Réime um Straitéis Mhuirí

An Straitéis Eorpach maidir le hAthléimneacht i Réimse an Uisce - glao ar fhianaise

Forléargas ar bheartas uisce an Aontais