Il-pjan tal-UE biex l-innovazzjoni fl-Ewropa tikber

Fl-Ewropa għandna riċerka, talent, u kreattività ta’ klassi dinjija b’abbundanza. Madankollu, ħafna drabi l-ideat li joriġinaw fl-Ewropa jissarrfu f’suċċess ekonomiku minn ħaddieħor, xi mkien ieħor. Dan qed jiġri għax l-innovaturi Ewropej hawnhekk isibu l-ħitan ma’ wiċċhom u jsibuha diffiċli biex jagħtu l-ħajja lill-ideat tagħhom. Minħabba f’hekk, il-Kummissjoni pproponiet att Ewropew ġdid dwar l-innovazzjoni biex tiffavorixxi, fl-Ewropa stess, l-iżvilupp, il-finanzjament, u l-firxa fuq skala kbira tal-aktar ideat innovattivi tal-Ewropa.

Biex tissaħħaħ is-sistema tal-innovazzjoni tal-UE, il-proposta se tindirizza żewġ sfidi ewlenin. L-ewwel nett, se tgħin lill-kumpaniji innovattivi jaċċessaw il-finanzjament billi

• tippromwovi qafas komuni tal-UE biex tiġi vvalutata l-proprjetà intellettwali
• toħloq suq diġitali li jpoġġi f’relazzjoni lix-xerrejja u l-bejjiegħa tal-proprjetà intellettwali
• toffri appoġġ espert biex il-kumpaniji jiġu megħjunin iwasslu l-ideat tagħhom sas-suq

Dan jista’ jiżblokka €10.2 biljun fis-sena f’finanzjament addizzjonali u jiġġenera madwar €35 miljun f’kostijiet amministrattivi ffrankati.

It-tieni, se tistabbilixxi approċċ komuni għall-akkwist fil-qasam tar-riċerka u l-iżvilupp, li se

• jipprovdi ċertezza legali akbar 
• jgħin lit-teknoloġiji l-ġodda jilħqu s-suq aktar malajr
• jagħmilha aktar faċli biex xerrejja pubbliċi minn pajjiżi differenti tal-UE jwettqu akkwisti b’mod konġunt fil-qasam tar-riċerka u l-iżvilupp. 

B’dan, il-kumpaniji jistgħu jistennew €25.92 biljun fi profitti annwali addizzjonali, filwaqt li x-xerrejja pubbliċi jistgħu jiffrankaw €1 biljun fis-sena.

L-att Ewropew dwar l-innovazzjoni huwa element tal-boxxla għall-kompetittività, li hija maħsuba biex jissaħħu l-kompetittività, il-prosperità, u s-sovranità teknoloġika fit-tul tal-UE. B’mod parallel, il-Kummissjoni se tgħin lill-innovaturi jaċċelleraw it-trasformazzjoni ta’ ideat innovattivi f’soluzzjonijiet tas-suq permezz ta’ proposta speċifika dwar ambjenti ta’ esperimentazzjoni regolatorja.

Għal iktar informazzjoni

Stqarrija għall-istampa — Il-Kummissjoni tipproponi Att Ewropew ġdid dwar l-Innovazzjoni biex tgħin lill-ideat innovattivi Ewropej jikbru u jikkompetu fid-dinja

Mistoqsijiet u tweġibiet dwar il-Patt Ewropew dwar l-Innovazzjoni

Skeda informattiva fuq l-Att Ewropew dwar l-Innovazzjoni

L-Att Ewropew għall-Innovazzjoni