An Cárta Eorpach um Árachas Sláinte: tú a choinneáil sábháilte agus tú ag taisteal thar lear

Ar ghortaigh tú tú féin riamh agus tú ag surfáil sa Fhrainc agus an raibh ort greamanna a fháil? Ar leon tú do rúitín agus tú ag siúlóireacht sa Pholainn? Ar ghá duit riamh freastal ar dhochtúir mar gheall ar ghalar a bhí ort cheana, cuir i gcás diaibéitis, agus tú ar saoire sa Ghréig? B’fhéidir nár tharla na rudaí sin duit riamh, ach dá dtarlódh rud éigin mar sin agus tú i dtír eile, tá clúdach agat ón gCárta Eorpach um Árachas Sláinte (EHIC). 

Leis an gCárta Eorpach um Árachas Sláinte is féidir leat cúram leighis riachtanach agus práinneach a fháil i dtír eile, lena n-áirítear le haghaidh tinnis ainsealacha nó tinnis atá ort cheana, chomh maith le toircheas agus breith clainne. Tá an sé bailí in aon tír den Aontas, san Íoslainn, i Lichtinstéin, san Iorua, san Eilvéis agus sa Ríocht Aontaithe. Ní rogha eile ar árachas taistil é, agus ní chlúdaíonn sé aon chostais chúram sláinte príobháideach ná aon chóireálacha leighis pleanáilte.

Tríd an gcárta a úsáid, is féidir seirbhísí cúraim sláinte a fháil go díreach ó shaoráidí poiblí nó ó shaoráidí cúraim sláinte atá rannpháirteach ann faoi na coinníollacha céanna agus ar an gcostas céanna a bhíonn le híoc ag daoine atá faoi árachas sa tír ina bhfuil tú ar cuairt. Tá córas cúraim sláinte éagsúil ann ó thír go tír agus i dtír eile d’fhéadfadh costas a bheith ag baint le seirbhísí atá saor in aisce sa bhaile. Is féidir leat aisíocaíocht a éileamh ar na costais a thabhaíonn tú ón institiúid náisiúnta agus tú fós sa tír agus aisíocaíocht a fháil go díreach ansin nó aisíocaíocht a iarraidh ar d’árachóir sláinte nuair a fhilleann tú abhaile.

Tá an Cárta Eorpach um Árachas Sláinte ag níos mó ná leath de dhaonra an Aontais. Tá sé éasca agus saor in aisce iarratas ar chárta a chur isteach – déan teagmháil le d’institiúid árachais sláinte roimh do thuras. Is gnách go bhfaighidh tú é tríd an bpost laistigh de chúpla lá. Má tá tú chun taisteal sula bhfaighidh tú an cárta, is féidir leat iarratas a dhéanamh ar dheimhniú athsholáthair an Chárta Eorpach um Árachas Sláinte.

Téigh ag taisteal faoi shuaimhneas ansin, agus fios agat go bhfuil an Cárta Eorpach um Árachas Sláinte ann chun tacú le do riachtanais cúraim sláinte thar lear.

Tuilleadh eolais

Cárta Eorpach um Árachas Sláinte

An dóigh leis an gcárta a úsáid

Cúram sláinte neamhphleanáilte