Qatt weġġajt waqt is-surfing fi Franza u kellek bżonn ta’ xi ponti? Fekkikt l-għaksa waqt passiġġata l-Polonja? Kellek bżonn tara tabib minħabba d-dijabete preeżistenti tiegħek waqt li kont fuq btala fil-Greċja? Forsi le, iżda f’każ li tiġrilek xi ħaġa bħal din waqt li tkun barra minn pajjiżek, tkoprik il-Karta Ewropea tal-Assigurazzjoni tas-Saħħa (EHIC).
L-EHIC tippermettilek tirċievi l-kura medika meħtieġa u urġenti barra mill-pajjiż, inkluż għal mard kroniku jew eżistenti, kif ukoll għat-tqala u l-ħlas. Hija valida fi kwalunkwe pajjiż tal-UE, fl-Iżlanda, fil-Liechtenstein, fin-Norveġja, fl-Iżvizzera, u fir-Renju Unit. L-EHIC mhijiex alternattiva għall-assigurazzjoni tal-ivvjaġġar, u ma tkopri l-ebda spiża tal-kura tas-saħħa privata jew trattamenti mediċi ppjanati.
Meta tippreżenta l-karta, tista’ tikseb servizzi tas-saħħa direttament mingħand faċilitajiet pubbliċi u parteċipanti tas-servizzi tas-saħħa, bl-istess kundizzjonijiet u bl-istess prezz bħall-persuni assigurati fil-pajjiż li tkun qed iżżur. Kull sistema tal-kura tas-saħħa ta’ pajjiż hija differenti, servizzi li huma bla ħlas f’pajjiżek jistgħu ma jkunux bla ħlas f’pajjiż ieħor. Inti tista' titlob rimborż tal-ispejjeż li tkun ġarrabt mill-istituzzjoni nazzjonali waqt li tkun għadek fil-pajjiż u tieħu r-rimborż direttament hemmhekk, jew titlob għal rimborż mill-assigurazzjoni tas-saħħa tiegħek meta tasal id-dar.
Aktar minn nofs il-popolazzjoni tal-UE għandha l-EHIC. L-applikazzjoni għal waħda hija faċli u bla ħlas – kemm tikkuntattja lill-istituzzjoni tal-assigurazzjoni tas-saħħa tiegħek qabel il-vjaġġ tiegħek. Tipikament tirċeviha bil-posta fi żmien ftit jiem. Jekk se tivvjaġġa qabel ma tikseb il-karta, tista’ tapplika għal ċertifikat ta’ sostituzzjoni tal-EHIC.
Ivvjaġġa moħħok mistrieħ, meta tkun taf li l-EHIC qiegħda hemm biex tappoġġja l-ħtiġijiet tal-kura tas-saħħa tiegħek barra minn pajjiżek.
Għal aktar informazzjoni
- Data tal-pubblikazzjoni
- 6 Awwissu 2026
- Awtur
- Id-Direttorat Ġenerali għall-Komunikazzjoni