L-UE fil-Logħob Olimpiku ta’ Pariġi 2024: l-għaqda, is-solidarjetà u d-diversità

Nipprattikawh fil-ħajja tagħna ta’ kuljum - meta nimxu biex naħdmu jew immorru għall-għawm. Narawh u ngawduh b’mod dirett jew fuq it-televiżjoni. L-isport hu għalkollox madwarna, u jirrappreżenta parti integrali mill-ħajja ta’ miljuni ta’ Ewropej. B’mod speċjali dan is-sajf, wara li l-Logħob Olimpiku ta’ Pariġi tal-2024, l-akbar avveniment sportiv globali ta’ kulħadd, beda lbieraħ, b’Ċerimonja tal-Ftuħ imxandra mad-dinja kollha. 

Għall-ewwel darba l-UE dehret b’mod prominenti ħafna fiċ-Ċerimonja tal-Ftuħ tal-Logħob Olimpiku ta’ Pariġi tal-2024 bi prestazzjoni fuq barkun fuq wiċċ l-ilma taħt il-motto tal-Unjoni Ewropea “Magħquda fid-diversità”. Fuq id-dgħajsa kien hemm żeffiena, li jissimbolizzaw iż-żgħożija, l-ispirtu tal-ftuħ u d-dinamiżmu tal-UE, li żifnu l-mużika tal-Eurodance.

Din kienet opportunità unika għall-UE biex tippromwovi l-valuri tagħha bħall-paċi, l-għaqda u s-solidarjetà, fejn id-diversità hi saħħa, u l-ispirtu ta’ tim hu kruċjali għas-suċċess, billi assoċjathom ma’ dawk tal-Logħob Olimpiku ta’ Pariġi tal-2024. 

Il-logħob Olimpiku joffri wkoll l-okkażjoni biex tiġi enfasizzata l-importanza tal-libertà tal-moviment u l-istudju fl-UE, speċjalment għaż-żgħażagħ, kif ukoll il-politiki u l-attivitajiet tal-UE marbutin mal-appoġġ għall-isport u ż-żgħażagħ.

Nedejna wkoll il-counter tal-midalji Ewropej – Tim Ewropa 2024 għal-Logħob Olimpiku u Paralimpiku, fejn se tkun tista’ ssegwi u tiċċelebra l-kisbiet tal-atleti tal-UE billi tgħodd il-midalji tagħhom.

Iżda x’tagħmel l-UE biex tippromwovi l-isport? 

L-isport għandu jkun għal kulħadd. Hu għalhekk li l-UE tippromwovih permezz tal-programm Erasmus+ tagħha, filwaqt li tippromwovi d-djalogu, l-appoġġ u l-parteċipazzjoni fl-oqsma kollha tal-politika tal-isport. Hemm ukoll il-Ġimgħa Ewropea tal-Isport li ssir kull sena mit-23 sat-30 ta’ Settembru, inizjattiva li tippromwovi l-benefiċċji tal-isport u tal-attività fiżika fl-Ewropa kollha fil-livelli nazzjonali, reġjonali u lokali.

Li l-isport isir aċċessibbli għal kulħadd hu wkoll dwar it-trawwim ta’ sens ta’ inklużjoni u integrazzjoni soċjali. Kull sena, il-Kummissjoni tirrikonoxxi l-organizzazzjonijiet li xogħolhom juża s-setgħa tal-isport biex itejjeb l-inklużjoni soċjali għall-gruppi żvantaġġati permezz tal-Premjijiet tal-UE għall-Isport #BeInclusive. Taħdem ukoll mal-pajjiżi kollha tal-UE u mal-organizzazzjonijiet sportivi nazzjonali biex tqajjem kuxjenza dwar l-importanza tal-ugwaljanza bejn il-ġeneri fl-isport. 

L-isport għandu jkun ġust ukoll, b’mod partikolari fl-isport kompetittiv u professjonali. L-UE tipproteġi l-integrità fl-isport billi tiġġieled kontra d-doping, kif tagħmel billi tikkoordina u taqsam l-informazzjoni mas-sħab internazzjonali. Fir-rigward tax-xiri tal-logħob, il-Kummissjoni tieħu rwol attiv, bħala parti minn sforzi usa’ biex tiżgura li l-isport kompetittiv jibqa’ ġust.

Permezz ta’ dawn l-isforzi biex l-isport isir aktar ġust, aktar inklużiv u aktar aċċessibbli, l-UE qed tgħin biex jintlaħqu l-valuri ewlenin tagħha ta’ paċi, unità, solidarjetà u diversità. U dan hu kif għandu jkun. Wara kollox, l-isport għandu rwol vitali, mhux biss fis-saħħa u l-istat fiżiku tajjeb individwali, iżda wkoll fit-tiswir tas-soċjetà Ewropea usa’ tagħna. 

Għal aktar informazzjoni:

Counter tal-midalji Ewropej

L-UE u l-isport

Ġimgħa Ewropea tal-Isport