An 1 Iúil 2026 tabharfaidh an tAontas dleacht chustaim shealadach €3 isteach i dtaobh beartáin ar luach íseal a iompórtáiltear ó áit éigin lasmuigh den Aontas, rud a dhéanfar tríd an ríomhthráchtáil thar aon ní eile. Cuimseoidh sé sin raon leathan táirgí a cheannaítear ar líne go hiondúil, éadaí, bréagáin, earraí leictreonacha, agus earraí tomhaltais eile ar fiú suas le €150 iad,. cuir i gcás.
Gach aon lá, tagann na milliúin beartán ar luach íseal isteach san Aontas. Lear mór de na táirgí sna beartáin sin, ní chomhlíonann siad caighdeáin sábháilteachta an Aontais, déantar tearcluacháil orthu, nó dearbhaítear iad go bréagach chun dleachtanna custaim a sheachaint. Ina theannta sin, an díolúine reatha ó dhleachtanna custaim, tugann sí buntáiste éagórach do dhíoltóirí nach den Aontas iad thar ghnólachtaí ar san Aontas a dhéanann siad táirgí a mhonarú nó a dhíol.
In aghaidh na hítime a ghearrfar an dleacht nua, agus ní ar chainníocht a bheidh sí bunaithe, ach ar aicmiú taraife. Is éard a bheidh i gceist leis sin, go praiticiúil:
- má cheannaíonn duine cúig t-léine, dleacht chustaim €3 a ghearrfar (ós leis an aicmiú taraife céanna a bhaineann gach ceann de na t-léinte)
- má cheannaíonn duine trí t-léine agus uaireadóir, dleacht chustaim €6 a ghearrfar (ós le dhá aicmiú taraife ar leith a bhaineann na t-léinte agus an t-uaireadóir faoi seach)
Beidh an díoltóir nó an t-iompórtálaí freagrach as an dleacht a dhearbhú agus a íoc mar chuid den phróiseas custaim.
Cuideoidh an beart nua ó thaobh iomaíocht níos cothroime a chruthú i gcomhair ghnólachtaí an Aontais, cosaint níos fearr a thabhairt do thomhaltóirí ar tháirgí neamhshábháilte, dul i ngleic leis an gcalaois chustaim, agus aghaidh a thabhairt ar údair imní ó thaobh an chomhshaoil de a eascraíonn ón oll-loingseoireacht.
Tá an tAontas ag obair chun nósanna imeachta custaim a nuachóiriú ar mhaithe leis an margadh aonair a neartú agus lena chinntiú go mbeidh sé ina chothrom iomaíochta i measc na ngnólachtaí ar fad a dhíolann isteach san Aontas, agus go gcomhlíonfar rialacha sábháilteachta agus comhlíontachta an Aontais chomh maith.
Tuilleadh eolais
- Dáta foilsithe
- 29 Meitheamh 2026
- Údar
- Ard-Stiúrthóireacht na Cumarsáide
An nuacht ghaolmhar
The Commission presented a proposal to suspend certain trade-related provisions of the EU-Israel Association Agreement, and to sanction extremist ministers and violent settlers. It also proposed to further sanction Hamas.
Commission President Ursula von der Leyen issued a statement announcing the put on hold for 90 days of the recently adopted EU countermeasures.
President von der Leyen issued a statement following the announcement by the US of universal tariffs on the whole world.
In response to the imposition of new, unjustified US tariffs on EU steel and aluminium imports, the Commission has launched swift and proportionate countermeasures on US imports into the EU.