Tá bearta déanta ag an gCoimisiún chun cosaint na hEorpa a nuachóiriú agus chun feabhas a chur ar an tsoghluaisteacht mhíleata

Agus é ag tógáil ar a phleananna chun an tsíocháin a chosaint agus dlús a chur le hullmhacht cosanta ár mór-roinne, tá sraith beart curtha i láthair ag an gCoimisiún Eorpach ar cheart dóibh feabhas suntasach a chur ar an tsoghluaisteacht mhíleata ar fud na hEorpa. Cruthóidh na bearta limistéar soghluaisteachta míleata ar fud an Aontais inar féidir le trúpaí, trealamh agus sócmhainní míleata gluaiseacht timpeall go tapa agus go rianúil.   

Ag an am céanna, tá treochlár curtha i láthair ag an gCoimisiún freisin lena ndéanfar tionscal cosanta an Aontais a athrú ó bhonn trí bhorradh a chur faoin nuálaíocht shuaiteach agus trí thacú le gníomhaithe cosanta atá ag teacht chun cinn. 

Chun gluaiseacht mhíleata a chumasú ar luas agus ar scála, agus chun sinn a thabhairt níos gaire do ‘limistéar Schengen míleata’, déanfaidh na bearta an méid seo a leanas: 

• Deireadh a chur le bacainní rialála, mar shampla, nós imeachta ceada aonair amháin a bheith ann chun gléasanna míleata a bhogadh do gach ceann de 27 dtír an Aontais
• Creat éigeandála a chruthú le haghaidh nósanna imeachta meara agus rochtain tosaíochta ar bhonneagar
• Ullmhacht an bhonneagair iompair a fheabhsú, trí phríomhchonairí soghluaisteachta míleata an Aontais a uasghrádú go caighdeáin shibhialtacha agus mhíleata agus trí bhonneagar straitéiseach sibhialta/míleata a shainaithint agus a chosaint le bosca uirlisí athléimneachta nua
• Acmhainneachtaí iompair agus lóistíochta a chomhthiomsú agus a chomhroinnt
• Rialachas agus comhordú a neartú
• Comhar an Aontais le ECAT agus le comhpháirtithe eile a dhoimhniú. 

Ag an am céanna, d’eisigh an tAontas treochlár chun nuálaíocht shuaiteach – teicneolaíochtaí nua a athraíonn ó bhonn an chaoi a ndéantar rudaí – a scaoileadh agus chun tionscal cosanta na hEorpa a nuachóiriú. Baineann sé leas as na ceachtanna a foghlaimíodh ón gcogadh san Úcráin ina léirítear an chaoi a bhfuil an chogaíocht nua-aimseartha á hathrú ó bhonn ag teicneolaíochtaí cosanta. 

Leagtar amach ann céimeanna chun na pobail domhainteicneolaíochta agus cosanta a thabhairt le chéile, dlús a chur le húsáid ardteicneolaíochtaí i gcumais mhíleata agus borradh a chur faoi acmhainneacht táirgeachta na hEorpa tríd an nuálaíocht. 

Tá an treochlár dírithe ar cheithre phríomhthosaíocht: 

• tacú le hinfheistíocht i gcuideachtaí cosanta
• dlús a chur le forbairt teicneolaíochtaí nua
• rochtain ar chumais chosanta a leathnú
• na scileanna is gá a fhorbairt chun buntáiste teicneolaíoch na hEorpa a chothú 

Cuirfidh an Coimisiún tús láithreach le gníomhaíochtaí beartaithe an treochláir a chur i bhfeidhm. 

Cuirfear na bearta soghluaisteachta míleata faoi bhráid na Comhairle agus Pharlaimint na hEorpa lena nglacadh. 

Conas soghluaisteacht mhíleata san Aontas a fheabhsú

Tuilleadh eolais 

Soghluaisteacht mhíleata 

Treochlár um Chlaochlú an Tionscail Cosanta 

Beart a dhéanamh ar son na cosanta chun muintir na hEorpa a chosaint 

Preaseisiúint:  An Coimisiún bogtha i dtreo ‘limistéar Schengen míleata' agus chlaochlú an tionscail cosanta