Niċċelebraw il-75 sena tal-Ewropa, minn viżjoni għal realtà

Il-kliem profetiku ta’ Robert Schuman minn 75 sena ilu għadu validu llum

“L-Ewropa mhix se tissawwar kollha f’daqqa, jew skont pjan sempliċi. Se tissawwar b’kisbiet konkreti li l-ewwel joħolqu solidarjetà de facto."

Fid-9 ta’ Mejju 1950, il-Ministru tal-Affarijiet Barranin Franċiż ta’ dak iż-żmien Robert Schuman ippreżenta pjan għal kooperazzjoni aktar profonda fl-Ewropa. Dan kellu jsir il-bażi għall-proġett ta’ integrazzjoni Ewropea. Id-diskors tiegħu dakinhar, magħruf bħala d-Dikjarazzjoni ta’ Schuman, issa jitqies b’mod mifrux bħala d-data tat-twelid tal-Unjoni Ewropea. Huwa għalhekk li llum niċċelebraw Jum l-Ewropa. 

Fl-1950, il-pajjiżi Ewropej kienu għadhom qed jirkupraw mill-qerda umana u ekonomika tat-Tieni Gwerra Dinjija. Grupp ta’ politiċi Ewropej, determinati li ma jirrepetux l-iżbalji tal-passat, kellhom viżjoni komuni ta’ Ewropa magħquda li tipprevjeni aktar kunflitt bejn il-pajjiżi Ewropej. Il-pjan ta’ Schuman witta t-triq biex din il-viżjoni ssir realtà.

Il-pjan, żviluppat b’kooperazzjoni ma’ Jean Monnet, kien ibbażat fuq żewġ prinċipji ewlenin — il-paċi u s-solidarjetà. Dawn kellhom jinkisbu permezz tal-integrazzjoni tal-industriji tal-faħam u l-azzar tal-Ewropa tal-Punent. Għalhekk, fl-1952, inħolqot il-Komunità Ewropea tal-Faħam u l-Azzar, li permezz tagħha l-Ġermanja, Franza, l-Italja, in-Netherlands, il-Belġju u l-Lussemburgu ngħaqdu flimkien biex jmexxu l-industriji tal-faħam u l-azzar tagħhom taħt ġestjoni komuni. 

Fid-deċennji li segwew, din il-kooperazzjoni espandiet għal ħafna oqsma oħra u s-sitt membri fundaturi tal-Komunità tal-Faħam u l-Azzar espandew għas-27 Stat Membru tal-Unjoni Ewropea moderna. 

Matul dan iż-żmien, rajna l-waqgħa tal-komuniżmu u tad-dittatorjati fil-kontinent tagħna u l-bini u l-waqgħa tal-Ħajt ta’ Berlin. U rajna wħud mill-akbar kisbiet tal-UE, mit-twaqqif tas-Suq Uniku sa Erasmus u minn Schengen sal-Euro. Illum, qed infakkru dan l-anniversarju speċjali u dak kollu li ksibna u bnejna flimkien, u aktar. 

Sabiex jiċċelebraw Jum l-Ewropa, l-istituzzjonijiet Ewropej qed jiftħu l-bibien tagħhom għaċ-ċittadini kollha u se jorganizzaw varjetà ta’ attivitajiet online u fuq il-post fi Brussell, Strasburgu u l-Lussemburgu. Ingħaqad maċ-ċelebrazzjonijiet! L-attivitajiet kollha huma bla ħlas, u m’għandekx għalfejn tirreġistra għalihom.

Għal aktar informazzjoni

Avvenimenti ta’ Jum l-Ewropa

Iċ-ċelebrazzjonijiet ta’ Jum l-Ewropa 2025 tal-Kummissjoni Ewropea

Id-Dikjarazzjoni ta’ Schuman

Robert Schuman: l-arkitett tal-proġett ta’ integrazzjoni Ewropea