Il-25 anniversarju tal-Karta tal-UE: nipproteġu dak li hu għażiż għalina

Fis-7 ta’ Diċembru 2025, niċċelebraw il-25 anniversarju tal-Karta tad-Drittijiet Fundamentali tal-UE. 

Il-Karta tipproteġi u tippromwovi d-drittijiet fundamentali ta’ kulħadd fl-UE. Sa mill-2009, bid-dħul fis-seħħ tat-Trattat ta’ Liżbona, il-Karta għandha l-istess valur legali bħat-trattati fundaturi tal-UE. Dan ifisser li d-drittijiet li tagħti jorbtu legalment lill-istituzzjonijiet tal-UE u lill-pajjiżi tal-UE meta jimplimentaw il-liġi tal-UE. Bħala l-gwardjan tat-Trattati, il-Kummissjoni tista’ tieħu azzjoni kontra dawk li ma jirrispettawx dawn id-drittijiet fundamentali.

Il-Karta hija strument modern imfassal biex jirrifletti l-bidliet fis-soċjetà, xjentifiċi, u teknoloġiċi li seħħew maż-żmien. Fiha 50 dritt u libertà fundamentali, li jkopru sitt kategoriji:

• id-dinjità
• il-libertajiet
• l-ugwaljanza
• is-solidarjetà
• id-drittijiet taċ-ċittadini
• il-ġustizzja

Dawn id-drittijiet jiddeterminaw il-ħajja tagħna ta’ kuljum — mill-protezzjoni tad-data personali għall-garanzija ta’ kundizzjonijiet tax-xogħol ġusti, il-libertà tal-moviment u tal-kelma, id-dritt tal-vot, u l-aċċess għall-edukazzjoni u għas-servizzi tas-saħħa.

Biex tiċċelebra l-25 anniversarju, il-Kummissjoni ppubblikat sensiela ta’ filmati b’intervisti ma’ nies minn madwar l-UE li jirriflettu dwar kif id-drittijiet fundamentali huma importanti fil-ħajja ta’ kuljum. Dawn il-filmati għandhom l-għan li nsiru nafu aktar dwar il-Karta u jenfasizzaw ir-rilevanza tagħha għal individwi f’kuntesti soċjali u kulturali differenti. 

It-tisħiħ tal-applikazzjoni tal-Karta jitlob sforzi kontinwi. Fl-2020, il-Kummissjoni adottat strateġija biex jiġi żgurat li d-drittijiet li tagħti jsiru realtà għal kulħadd. Barra minn hekk, il-Kummissjoni tippubblika rapporti annwali biex timmonitorja l-progress fl-applikazzjoni tal-Karta.  

L-UE hija mibnija fuq il-valuri ta’ meta bdiet: id-drittijiet fundamentali, id-demokrazija, u l-istat tad-dritt. Li nipproteġu d-demokrazija u niddefendu l-valuri tal-UE jibqa’ waħda mill-prijoritajiet ewlenin tal-Kummissjoni. 

Għal aktar tagħrif

Id-drittijiet fundamentali tiegħek fl-UE