Għal Ewropa li għaddejja minn tranżizzjonijiet kbar — dik lejn enerġija nadifa, dik diġitali, u dik demografika — huwa importanti aktar minn qatt qabel li tinvesti fl-aqwa riżorsa li għandha, niesha. Il-baġit fit-tul tal-UE se jkun kruċjali għall-promozzjoni tad-drittijiet soċjali.
Permezz ta’ investimenti mmirati, se jiġu appoġġati
- l-impjiegi ta’ kwalità
- l-inklużjoni soċjali
- l-edukazzjoni u l-ħiliet
- l-akkomodazzjoni affordabbli u l-infrastruttura soċjali.
L-investiment fin-nies ifisser ukoll sostenn għall-parteċipazzjoni demokratika u għal spazju ċiviku dinamiku, kif ukoll il-protezzjoni tal-libertà artistika u kulturali. Il-baġit fit-tul se jkompli jinvesti fl-oqsma tal-ħiliet, il-kultura, il-midja u l-valuri.
Illustrazzjonijiet ewlenin
Infasslu l-investimenti skont il-ħtiġijiet lokali
Bħala parti mill-pjanijiet ġodda ta’ sħubija nazzjonali u reġjonali, il-Fond Soċjali Ewropew se jsostni l-edukazzjoni, l-impjiegi u objettivi soċjali fosthom
- ir-riformi u l-investimenti fit-tiġdid u t-titjib tal-ħiliet
- it-titjib fil-kwalità tas-sistemi edukattivi u tat-taħriġ
- il-ġlieda biex jinqered il-faqar u biex kulħadd ikollu saqaf fuq rasu.
Barra minn hekk, l-Istati Membri se jibbenefikaw mis-self b’appoġġ għall-politiki fil-qafas ta’ Catalyst Europe biex jagħtu sostenn lill-inklużjoni soċjali u l-iżvilupp tal-ħiliet.
Niġġieldu kontra l-faqar
Permezz ta’ pjanijiet ta’ sħubija, il-Fond Soċjali Ewropew se
- jippromwovi opportunitajiet indaqs għal kulħadd
- jappoġġa xbieki ta’ sikurezza soċjali b’saħħithom
- irawwem l-inklużjoni soċjali
- l-ekwità interġenerazzjonali, u
- jiġġieled kontra l-faqar.
Il-pjanijiet il-ġodda se jsostnu lil dawk l-aktar vulnerabbli, filwaqt li jsaħħu l-mudell soċjali Ewropew.
Nippromwovu l-innovazzjoni soċjali
Il-Faċilità tal-UE se tagħti spinta lill-innovazzjoni fl-ekonomija soċjali kollha billi ssostni
- il-mikrofinanzjament u l-finanzjament tal-intrapriżi soċjali
- l-ekonomija soċjali
- l-infrastruttura soċjali (inklużi l-infrastruttura tas-saħħa u tal-edukazzjoni)
- l-akkomodazzjoni soċjali u tal-istudenti.
Insostnu t-tagħlim u nindirizzaw id-diskrepanzi fil-ħiliet
Is-sinsla tal-Unjoni tal-Ħiliet se tkun il-Programm Erasmus+ imsaħħaħ, li se jipprovdi finanzjament essenzjali
- għall-isport u għall-inizjattivi taż-żgħażagħ
- għall-kollaborazzjoni bejn il-kulturi
- għall-opportunitajiet ta’ żvilupp personali
- għall-proġetti tal-parteċipazzjoni komunitarja.
Il-Fond Ewropew għall-Kompetittività se jgħin ukoll biex jinħolqu impjiegi ta’ kwalità f’setturi strateġiċi, billi jsostni t-tagħlim tul il-ħajja, l-edukazzjoni, il-proġetti ta’ taħriġ, u l-apprendistati.
Insostnu lis-soċjetà ċivili, il-valuri komuni, u d-demokrazija
Il-baġit fit-tul se jsostni lis-soċjetà ċivili bi programmi differenti. Pereżempju, is-sħubijiet nazzjonali u reġjonali u l-Fond għall-Kompetittività se jsostnu l-attivitajiet tal-LIFE favur l-ambjent, il-bijodiversità, u l-ekonomija ċirkulari.
Programm AgoraEU b’saħħtu se jippromwovi l-valuri komuni, inklużi d-demokrazija, l-ugwaljanza, u l-istat tad-dritt, u jsostni d-diversità kulturali Ewropea, is-setturi awdjoviżivi u kreattivi tagħha, il-libertà tal-midja, u l-parteċipazzjoni tas-soċjetà ċivili.
X’se jagħti l-baġit tal-UE llum
Il-Mużew Kroat tal-Istorja Naturali f’Zagreb, li fih l-akbar kollezzjoni fil-pajjiż, qed jiġi rinnovat bil-kbir b’sostenn mill-baġit tal-UE. Il-proġett jiffoka fuq il-palazz storiku Amadeo, u għandu l-għan li jespandi l-kapaċità tiegħu, iżid l-għadd tal-viżitaturi, u jsaħħaħ il-ħidma xjentifika u mużeoloġika tiegħu. Dan se joħloq impjiegi ġodda u lill-Mużew jagħmlu mutur ewlieni għat-turiżmu għall-iżvilupp kif ukoll għall-ħarsien tal-wirt kulturali.
Din il-paġna ġiet rieżaminata l-aħħar: 15 Jannar 2026