Is fisiceoir ríomhaireachtúil é an Dr Lindsay Bassman Oftelie a oibríonn chun ríomhairí candamacha níos fuinneamhéifeachtúla a fhorbairt. In 2022 roghnaigh sí an Eoraip. Bhog sí ó Berkeley Lab sna Stáit Aontaithe go CNR Nano in Pisa trí chomhaltacht iardhochtúireachta Ghníomhaíochtaí Marie Skłodowska-Curie. Thug Aireacht Gnóthaí Eachtracha na hIodáile aitheantas don Dr Bassman Oftelie as a hiarrachtaí sa chumarsáid eolaíochta agus sa taidhleoireacht.
Is cuideachta atá i mbun fáis é QuantumDiamonds atá bunaithe i München, agus d’fhorbair sé an chéad chóras cigireachta leathsheoltóra ar domhan atá ar fáil ar bhonn tráchtála, é bunaithe ar bhrath candamach. Braitheann a chuid meaisíní lochtanna i micrishliseanna nua-aimseartha nárbh fhéadfadh aon teicneolaíocht eile a bhrath roimhe seo. Tá na meaisíní in úsáid cheana féin ag custaiméirí sna Stáit Aontaithe agus sa Téaváin. De réir mar a théann castacht sliseanna i méid, leis an nuálaíocht cheannródaíoch seo, daingnítear an bunús leathsheoltóra ar a bhfuil an intleacht shaorga bunaithe agus tugtar fíorbhuntáiste iomaíoch don Eoraip i rás domhanda na hintleachta saorga.
Is fiontar sóisialta é ‘Caffé Aktywni’ in Gdańsk na Polainne atá á reáchtáil ag Fundacja ‘Świat Wrażliwy’ (‘Fondúireacht an Domhain Íogair’) ina bhfostaítear daoine óga faoi mhíchumas intleachta agus seanóirí a fheidhmíonn mar mheantóirí dóibh. Cruthaíonn sé spás don sóisialú agus don ghairmoiliúint, agus san am céanna, imeasctar daoine a eisiatar go minic ó mhargadh an tsaothair leis. A bhuí le tacaíocht ó NextGenerationEU, bhíothas in ann cistin an chaifé a nuachóiriú agus uirlisí oiriúnaithe a cheannach le haghaidh seirbhísí lónadóireachta.
Tá acmhainneacht ollmhór fuinnimh gaoithe ag oileán Bornholm i Muir Bhailt. Is é tionscadal Oileán Fuinnimh Bornholm an chéad toradh is féidir a bhaint amach faoi na Mórbhealaí Fuinnimh. Forbrófar leis feirmeacha gaoithe amach ón gcósta agus nascfaidh sé 3 GW de leictreachas le heangacha náisiúnta na Danmhairge agus na Gearmáine. Leis sin déanfar acmhainn chomhroinnte Eorpach den fhuinneamh gaoithe, ar acmhainn náisiúnta é roimhe, agus d’fhéadfaí mol amach ón gcósta a dhéanamh de Mhuir Bhailt a fheidhmeoidh mar threoirphlean do thionscadail ar fud an Aontais, agus muid ag iarraidh neamhspleáchas fuinnimh a bhaint amach. Tá tacaíocht €645 mhilliún á fáil ag an tionscadal faoin tSaoráid um Chónascadh na hEorpa.
Chaill Jackie Fox a hiníon 21 bhliain d’aois Nicole ‘Coco’ go tragóideach nuair a chuir sí lámh ina bás féin in 2018 tar éis di mí-úsáid a fhulaingt arís agus arís eile ar líne agus as líne araon. Tar éis bhás Nicole, chuaigh Jackie i mbun feachtais chun na lúba ar lár a bhí sa dlí in Éirinn a dhúnadh, lúba ar lár a d’fhág nár tugadh cibearbhulaithe chun cuntais. Mar thoradh ar a habhcóideacht gan staonadh, ritheadh Dlí Coco in 2020 agus rinneadh cion coiriúil den chibearbhulaíocht, rud nach ndearnadh riamh roimhe. Tá an Coimisiún tiomanta i gcónaí an bhulaíocht ar líne a chomhrac. Tá Plean Gníomhaíochta in aghaidh na Cibearbhulaíochta seolta agus, ina theannta sin, Painéal Speisialta maidir le Sábháilteacht Leanaí ar Líne a n-úsáidfear a mholtaí mar bhonn eolais do ghníomhaíochtaí an Choimisiúin chun a gcosaint a neartú.
Is minic a bhíonn amanna feithimh fada agus rochtain theoranta ar chúram speisialaithe agus ar dhiagnóisic choisctheach roimh chónaitheoirí sa réigiún teorann idir an Pholainn agus an Liotuáin. Trí mhaoiniú comhtháthaithe an Aontais, rinne an t-ospidéal Pro-Medica in Ełk na Polainne nuachóiriú ar a n-obrádlanna agus thug sé isteach trealamh úrscothach le haghaidh obráidí íosionracha, agus comhsheirbhísí á bhforbairt ag an am céanna le hospidéal comhpháirtíochta sa Liotuáin. Anois is féidir le hothair diagnóis níos luaithe, cóireáil mháinliachta níos sábháilte agus cúram speisialaithe ar ardchaighdeán a fháil ina réigiún baile. Leis an tionscadal freisin, leathnaíodh scagthástálacha coisctheacha, rud lena gcuirtear ar fáil diagnóis níos luaithe agus cóireáil thráthúil. Is sampla soiléir é den chaoi a bhfuil feabhas á chur ag an mbeartas comhtháthaithe, agus na tosaíochtaí nua a cuireadh isteach mar chuid de le linn a athbhreithnithe meántéarma, ar an gcáilíocht saoil i réigiúin na teorann thoir.
Is saoránach de Phoblacht na Seice é Miroslav atá 59 mbliana d’aois. Chaith sé níos mó ná 10 mbliana ar an tsráid sular aimsigh oibrithe sóisialta árasán dó agus sular thacaigh siad leis. Ba mhór an faoiseamh é sin dó agus chuidigh sé leis teacht ar ais chuige féin an athuair. Leis an tionscnamh ‘Tús Áite don Tithíocht’, a fhaigheann tacaíocht ó Chiste Sóisialta na hEorpa Plus, cuirtear tithíocht inacmhainne ar fáil in éineacht le treoir maidir le sláinte, le fostaíocht agus le hatógáil nasc teaghlaigh. Is mian le Miroslav an comhar sin a íoc agus tá sé ag díriú anois ar chuidiú a thabhairt do dhaoine eile atá fós ag fanacht le tithíocht shóisialta.
Is gníomhaí Ungárach de bhunadh Romach é Géza Buzás-Habel, Stiúrthóir Bainistíochta Líonra Óige Diverse. Baineann a chuid oibre le cearta an duine a chosaint agus le chomhionannas agus saoirse comhthionóil shíochánta a chosaint. Le fada an lá, chuidigh sé chun imeacht Bhród in Pécs a eagrú, an t-aon imeacht Bhród a reáchtáladh lasmuigh de Bhúdaipeist. D’ainneoin gur chuir rialtas na hUngáire cosc ar cheiliúradh Bhród in Pécs in 2025, bhí Géza i gceannas ar an mórshiúl. Tionscnaíodh imeachtaí coiriúla ina choinne 5 mhí ina dhiaidh sin toisc gur cuireadh ina leith gur eagraigh sé tionól a raibh cosc air. Tarraingíodh na cúisimh siar ó shin. Leanann sé de bheith ag obair tríd an Líonra Óige Diverse chun infheictheacht na Romach, LADTI+ agus pobal imeallaithe eile a mhéadú, agus chun dlúthpháirtíocht a chothú i measc na bpobal sin.
Nuair a scaipeadh an scéal go raibh eangacha iascaireachta thar a bheith úsáideach chun dróin a stopadh le nach mbainfeadh siad bonneagair amach agus damáiste a dhéanamh dóibh, chuir pobail iascaireachta ón bhFionlainn, ón bhFrainc agus ón Iodáil eangacha ar fáil in áiteanna na mílte ciliméadar ar shiúl uathu chun tithe, scoileanna, ospidéil, bóithre agus beatha daoine a chosaint. Trí Shásra an Aontais um Chosaint Shibhialta, dheonaigh iascairí 110 dtona d’eangacha iascaireachta. Rinne siad amhlaidh chun beatha daoine a shábháil san Úcráin, d’ainneoin gurbh iad na heangacha sin a d’úsáid siad chun slí bheatha a bhaint amach.
Nuashonraíodh an leathanach seo den uair dheireanach an 11 Meán Fómhair 2026