Traineeships u opportunitajiet oħra għaż-żgħażagħ fl-UE

Iż-żgħażagħ ħerqana li jaħdmu mal-istituzzjonijiet, il-korpi jew l-aġenziji tal-UE għandhom bosta għażliet biex jiksbu esperjenza siewja. It-traineeships joffru lill-professjonisti żgħażagħ esperjenza prattika ta’ xogħol u akkwist tal-ħiliet qabel ma jgħaddu għal impjieg regolari, filwaqt li l-volontarjat jippermetti l-iżvilupp ta’ ħiliet prattiċi u huwa ideali għal dawk li qed ifittxu li jħallu impatt pożittiv.

Il-Kummissjoni Ewropea toffri l-programm Blue Book, traineeship bi ħlas ta’ 5 xhur miftuħ għaċ-ċittadini kollha tal-UE b’għadd limitat ta’ postijiet allokati wkoll lil ċittadini mhux tal-UE. It-trainees jiksbu esperjenza prattika f’diversi oqsma tat-tfassil tal-politika tal-UE, ir-riżorsi umani, it-traduzzjoni, u oqsma oħra, li jikkontribwixxu għal proġetti li jsawru l-futur tal-Ewropa. L-applikazzjonijiet għat-traineeships li jibdew f’Marzu 2025 huma miftuħin sal-31 ta’ Awwissu fl-10:00 (CEST). L-applikanti jrid ikollhom lawrja universitarja u profiċjenza fi 2 jew 3 lingwi tal-UE, skont it-tip ta’ traineeship. Il-proċess tal-applikazzjoni jinvolvi l-mili ta’ formola online u l-għoti ta’ dokumenti ta’ sostenn permezz tal-portal uffiċjali tal-Kummissjoni.

Lil hinn mill-Kummissjoni, diversi istituzzjonijiet, korpi u aġenziji tal-UE joffru internships u pożizzjonijiet ta’ volontarjat, filwaqt li jipprovdu għarfien uniku dwar l-operazzjonijiet tal-UE u jrawmu t-tkabbir professjonali. Dawn il-pożizzjonijiet huma disponibbli f’firxa wiesgħa ta’ oqsma bħar-riżorsi umani, il-komunikazzjoni, l-IT, il-liġi tal-kompetizzjoni, il-politika ambjentali, ir-relazzjonijiet esterni, il-politika tal-iżvilupp u aktar.

Il-Korp Ewropew ta’ Solidarjetà (KES) huwa inizjattiva li toffri opportunitajiet differenti għaż-żgħażagħ ta’ bejn it-18 u t-30 sena. Dan jiffoka fuq l-għajnuna lill-komunità usa’ u l-promozzjoni tas-solidarjetà fl-Ewropa u lil hinn minnha. Permezz ta’ proġetti ta’ volontarjat u solidarjetà, il-parteċipanti jistgħu jinvolvu ruħhom fi proġetti relatati mal-għajnuna umanitarja, l-inklużjoni soċjali, l-ambjent, il-kultura, l-edukazzjoni u oħrajn. Il-kollokamenti tal-KES jistgħu jdumu minn xahrejn sa sena u jkopru spejjeż bażiċi bħall-akkomodazzjoni u l-ikel, flimkien ma’ allowance żgħira għall-ispejjeż personali. 

Is-sejbien tat-traineeship it-tajjeb jista’ jkun ta’ sfida, iżda hemm ħafna riżorsi disponibbli biex jgħinu lill-professjonisti żgħażagħ. Il-portal tal-Uffiċċju Ewropew għas-Selezzjoni tal-Persunal (EPSO) joffri firxa wiesgħa ta’ programmi ta’ traineeships ma’ diversi istituzzjonijiet, korpi u aġenziji tal-UE. Il-Portal Ewropew taż-Żgħażagħ jipprovdi riżorsi u gwida dwar kif issib u tapplika għal pożizzjonijiet fl-Ewropa, inklużi l-volontarjat, it-traineeships, ix-xogħol u l-istudju barra mill-pajjiż.

Fl-2024, il-Kummissjoni pproponiet inizjattiva biex ittejjeb il-kundizzjonijiet tax-xogħol tat-trainees, inkluża l-paga, kif ukoll l-inklużività u l-kwalità tat-traineeships fl-UE. L-inizjattiva se tiżgura wkoll li l-impjieg regolari ma jkunx jista’ jiġi moħbi bħala traineeships. 

Għal aktar informazzjoni

Il-programm tal-Blue Book traineeships tal-Kummissjoni

Il-Korp Ewropew ta’ Solidarjetà

Informazzjoni dwar traineeships fl-istituzzjonijiet, il-korpi u l-aġenziji tal-UE 

Il-Portal Ewropew taż-Żgħażagħ

Il-politika tal-UE għal traineeships ta’ kwalità fl-UE