Nissimplifikaw ħajjet il-bdiewa

Il-bdiewa madwar l-UE jiffaċċjaw obbligi amministrattivi kbar minbarra x-xogħol proprju tagħhom. Jieħdu ħafna ħin biex jindirizzawhom u dan jiswiehom il-flus, kemm lill-bdiewa kif ukoll lill-amministrazzjonijiet nazzjonali. Għalhekk, bħala parti minn sforz usa’ ta’ simplifikazzjoni, il-Kummissjoni Ewropea pproponiet sett ta’ bidliet fir-regoli tal-politika agrikola komuni li se jeħilsu lill-bdiewa minn dan il-piż regolatorju u jistimulaw il-kompetittività.  

Il-bidliet proposti jinkludu: 

Pagamenti aktar faċli għall-bdiewa żgħar 

• il-limitu annwali tal-pagament ta’ somma f’daqqa għall-bdiewa żgħar se jiżdied minn €1,250 għal €2,500
• il-bdiewa żgħar se jkunu eżentati minn ċerti regoli ambjentali u jistgħu jibbenefikaw minn pagamenti li jippremjaw il-biedja ekoloġika. 

Rekwiżiti u kontrolli ambjentali simplifikati 

• l-azjendi agrikoli organiċi ċċertifikati se jitqiesu awtomatikament li jissodisfaw xi wħud mir-rekwiżiti ambjentali tal-UE għall-finanzjament
• il-bdiewa jistgħu jibbenefikaw minn inċentivi biex jipproteġu t-torbieri u l-artijiet mistagħdra
• il-kontrolli se jiġu ssimplifikati bl-użu tas-satellita u t-teknoloġija u se jkunu limitati għal verifika fuq il-post darba fis-sena għal kull azjenda agrikola 

Immaniġġar imsaħħaħ tal-kriżijiet u proċeduri aktar sempliċi għall-amministrazzjonijiet nazzjonali 

• Il-bdiewa tal-UE affettwati minn diżastri naturali jew minn mard tal-annimali se jiġu appoġġati bil-pagamenti ġodda għall-kriżijiet u b’għodod aktar flessibbli u aċċessibbli għall-immaniġġar tar-riskju
• Il-pajjiżi tal-UE se jibbenefikaw minn aktar flessibbiltà fl-adattament tal-pjanijiet strateġiċi tal-PAK tagħhom, u l-approvazzjoni minn qabel tal-Kummissjoni se tkun meħtieġa biss għall-emendi strateġiċi. 

Kompetittività u diġitalizzazzjoni msaħħa 

• il-bdiewa żgħar jistgħu jagħmlu użu minn għażla ta’ finanzjament sempliċi ġdida li toffri sa €50,000 bħala somma f’daqqa biex tgħin fit-tkabbir tal-azjendi agrikoli tagħhom
• l-amministrazzjonijiet nazzjonali se jiġu mħeġġa jiżviluppaw sistemi diġitali interoperabbli, sabiex il-bdiewa jkollhom jibagħtu d-data tagħhom darba biss, b’sistema unika, filwaqt li jiffrankaw il-ħin u jnaqqsu l-ispejjeż 

Dan il-pakkett ta’ simplifikazzjoni jibni fuq miżuri simili diġà introdotti mill-Kummissjoni fl-2024 u jirrappreżenta riżultat ewlieni mill-viżjoni għall-agrikoltura u l-ikel tal-UE ppreżentata fi Frar 2025. Il-proċess se jkompli aktar tard din is-sena b’pakkett ta’ simplifikazzjoni leġiżlattiva trażversali, immirat lejn politiki oħra li għandhom impatt fuq il-bdiewa, in-negozji agroalimentari, u l-amministrazzjonijiet. 

Għal aktar informazzjoni 

EU actions to address farmers’ concerns – il-Kummissjoni Ewropea

Is-sostenn tal-kwalità tal-ħajja tagħna: sigurtà tal-ikel, ilma u natura

Stqarrija għall-istampa: Il-Kummissjoni tissimplifika l-Politika Agrikola Komuni biex tappoġġa lill-bdiewa u ttejjeb il-kompetittività