Pjan biex l-Ewropa ssir l-ewwel kontinent elettrifikat.

Il-Kummissjoni żvelat pjan ta’ azzjoni ġdid dwar l-elettrifikazzjoni li għandu l-għan li jħaffef il-bidla mill-fjuwils fossili lejn l-elettriku fl-Ewropa fl-industrija, fit-trasport u fil-bini. L-għan huwa li l-Ewropa ssir l-ewwel kontinent “li jaħdem bl-elettriku” fid-dinja billi timmira li żżid l-elettrifikazzjoni mit-23 % tal-użu tal-enerġija tal-lum għal 46 % sal-2040. Bl-ilħuq ta’ dan l-għan, l-UE tista’ tiffranka EUR 260 biljun fis-sena f’importazzjonijiet tal-fjuwils fossili.

Il-benefiċċji tal-bidla għall-elettrifikazzjoni jinkludu

• it-tnaqqis tad-dipendenza fuq il-fjuwils fossili importati, li se jagħmel lill-Ewropa aktar indipendenti u kompetittiva, u jnaqqas il-vulnerabbiltà għax-xokkijiet ġeopolitiċi
• l-immodernizzar u d-dekarbonizzazzjoni tas-sistema tal-enerġija tal-Ewropa, li se jgħinu biex titħaffef it-tranżizzjoni ekoloġika 
• il-kisba ta’ benefiċċji għall-konsumaturi Ewropej: is-sewqan ta’ vettura elettrika bil-batterija jista’ jiffranka sa 78 % meta mqabbel ma’ karozza ekwivalenti li taħdem bil-fjuwils fossili. Il-bidla minn bojlers tal-gass għal pompi tas-sħana tnaqqas il-kont medju tat-tisħin tal-unitajiet domestiċi tal-UE b’sa 60 %.

Madankollu, għad iridu jiġu indirizzati diversi sfidi. L-elettriku spiss iqum tliet darbiet aktar mill-gass. Il-konnessjonijiet mal-grilja jistgħu jieħdu s-snin. Hemm wisq teknoloġiji innovattivi li qatt ma jilħqu skala kummerċjali. Il-kumpaniji ftit li xejn għandhom inċentiv biex jaqilbu mill-fjuwils fossili għall-elettriku. 

Il-pjan il-ġdid jindirizza dawn l-isfidi kollha. Dan jagħmlu billi jipproponi sensiela ta’ miżuri li se jgħinu biex jitnaqqas id-distakk fil-prezzijiet bejn il-kostijiet tal-elettriku u tal-enerġija fossili u billi jinċentiva l-użu ta’ teknoloġiji aktar nodfa u bbażati fuq l-elettriku bħall-pompi tas-sħana, il-vetturi elettriċi u l-batteriji, fost l-oħrajn. Il-miżuri fil-pjan jinkludu

• kontijiet tal-elettriku li jibqgħu validi fil-futur fl-UE billi l-pajjiżi tal-UE jingħataw is-setgħa li jnaqqsu t-tariffi tan-networks għal ċerti gruppi ta’ konsumaturi u t-taxxi għan-negozji intensivi fl-enerġija
• l-inkoraġġiment ta’ użu aktar mgħaġġel ta’ miters intelliġenti, li se jagħmilha aktar faċli għall-konsumaturi biex jiffrankaw fuq il-kontijiet tal-enerġija tagħhom
• it-tnaqqis tal-kostijiet bil-quddiem tat-teknoloġiji tal-elettrifikazzjoni fis-setturi fid-domanda ewlenin. Dan se jinkiseb billi jiġu mobilizzati għodod bħall-iskemi ta’ twellija soċjali, l-istrument finanzjarju tas-Sistema għall-Iskambju ta’ Kwoti tal-Emissjonijiet (ETS) u l-Fond Soċjali għall-Klima.
• it-tħaffif tal-użu tal-grilji tal-elettriku Ewropej permezz tal-pakkett dwar il-grilji 
• l-aċċellerazzjoni tal-adozzjoni ta’ soluzzjonijiet innovattivi ta’ elettrifikazzjoni 
• l-investiment fil-ħiliet u l-impjiegi fl-elettrifikazzjoni, bil-potenzjal li jinħolqu mijiet ta’ eluf ta’ impjiegi ta’ kwalità

Fl-istess jum li l-Kummissjoni ppreżentat dan il-pjan, ħabbret ukoll rieżami tal-EU ETS, il-politika ewlenija tal-UE dwar id-dekarbonizzazzjoni. Kuntest ġeopolitiku u ekonomiku li kull ma jmur qed jinbidel ifisser li anke din il-politika teħtieġ modernizzazzjoni. Dan ir-rieżami, flimkien mal-pjan ta’ azzjoni huma parti mill-isforzi usa’ tal-UE biex tagħti spinta lill-kompetittività, id-dekarbonizzazzjoni u l-indipendenza tal-Ewropa.

Għal aktar tagħrif

Stqarrija għall-istampa — Il-Kummissjoni tagħti spinta lill-kompetittività, id-dekarbonizzazzjoni u l-indipendenza tal-Ewropa permezz tal-Pjan ta’ Azzjoni għall-Elettrifikazzjoni u r-rieżami tal-ETS

Q&A dwar il-pjan ta’ azzjoni għall-elettrifikazzjoni

Q&A dwar ir-rieżami tal-EU ETS

Skeda informattiva dwar il-Pjan ta’ Azzjoni tal-UE għall-Elettrifikazzjoni u t-tariffi tan-Networks