Labhraímis faoi réigiúin agus cathracha na hEorpa

Cuirtear tús inniu le Seachtain Eorpach na Réigiún agus na gCathracha, an t-imeacht bliantúil is mó atá tiomnaithe do bheartas comhtháthaithe an Aontais. Ag an imeacht ceithre lá seo tugtar le chéile meascán éagsúil páirtithe leasmhara, ó pholaiteoirí go gnólachtaí agus ón tsochaí shibhialta go dtí an saol acadúil, chun plé a dhéanamh ar dhúshláin choiteanna do réigiúin agus do chathracha na hEorpa agus chun breathnú siar ar an iliomad éachtaí atá bainte amach.

Is é beartas comhtháthaithe an Aontais straitéis an Aontais Eorpaigh chun forbairt chomhchuí fhoriomlán a Bhallstát agus a réigiún a chur chun cinn agus chun tacú léi. Is é sin an chaoi a gcuidíonn an tAontas lena réigiúin bheagfhorbartha breith suas le meán an Aontais. 

Le cúig bliana anuas, lean an Beartas Comhtháthaithe de bheith ag déanamh beart de réir a bhriathair do shaoránaigh an Aontais, tríd an méid seo a leanas a dhéanamh:

• tacaíocht a thabhairt do 2.7 milliún gnólacht
• bonneagar agus trealamh oideachais a leathnú, rud a théann chun tairbhe do thart ar 18 milliún leanbh agus duine óg
• tacú le 260,000 post a chruthú i bhfiontair nua
• 13.5 milliún duine a chosaint a bhuí le bearta cosanta ar thuilte
• feabhas a chur ar fheidhmíocht fuinnimh 380,000 teaghlach
• feabhas a chur ar an nasc leathanbhanda do 3.1 milliún teaghlach
• tacaíocht a thabhairt do 12.8 milliún duine ar a laghad chun páirt a ghlacadh san oideachas agus san oiliúint

Chuidigh sé freisin le réigiúin uile an Aontais aghaidh a thabhairt ar éifeachtaí géarchéimeanna nach bhfacthas a leithéid riamh roimhe seo, is iad sin paindéim COVID-19, insreabhadh dídeanaithe ón Úcráin tar éis chogadh foghach na Rúise, agus an ghéarchéim fuinnimh a tharla ina dhiaidh sin.

Is colún bunúsach de thionscadal an Aontais é na héagothromaíochtaí idir réigiúin agus cathracha an Aontais a laghdú. Is féidir an beartas réigiúnach a rianú siar go dtí Conradh na Róimhe agus bunú na gComhphobal Eorpach in 1957. Réitigh sé sin an bealach chun Ard-Stiúrthóireacht thiomnaithe um Beartas Réigiúnach a chruthú in 1968 agus chun Ciste Forbraíochta Réigiúnaí na hEorpa a chruthú in 1975.

Tuilleadh eolais

Seachtain Eorpach na Réigiún agus na gCathracha

Beartas comhtháthaithe

Eolas faoin mBeartas Comhtháthaithe i dtíortha an Aontais

Preaseisiúint: An 22ú eagrán de Sheachtain Eorpach na Réigiún agus na gCathracha: déantar an méid atá bainte amach a mheas agus féachtar chun cinn ar a bhfuil i ndán don Bheartas Comhtháthaithe