Kif taħdem is-sistema diġitali l-ġdida tal-fruntieri

Is-sistema diġitali l-ġdida tal-fruntieri tal-UE, is-Sistema ta’ Dħul/Ħruġ, bdiet topera fit-12 ta’ Ottubru 2025. Se tapplika għal vjaġġaturi mhux mill-UE li jidħlu jew joħorġu mill-UE u se tagħmel l-ivvjaġġar aktar faċli u aktar sikur għal kulħadd. Minn issa ’l quddiem, il-pajjiżi tal-UE se jibdew jirreġistraw b’mod elettroniku d-data ta’ dawk li jidħlu fl-UE għal soġġorni qosra — 90 jum f’perjodu ta’ 180 jum.

Fil-prattika, meta s-sistema l-ġdida tkun diġà fis-seħħ, iċ-ċittadini mhux tal-UE se jkollhom id-data tal-passaport, id-data bijometrika (l-immaġni tal-wiċċ u l-marki tas-swaba’) u d-data tad-dħul jew tal-ħruġ tagħhom irreġistrata fis-sistema. Ir-reġistrazzjoni ssir fl-ewwel dħul u fl-ewwel ħruġ; imbagħad, għal kull dħul u ħruġ sussegwenti, tkun meħtieġa biss verifika rapida. Is-sistema l-ġdida tissostitwixxi l-prattika attwali tal-ittimbrar manwali tal-passaporti u tissodisfa l-ogħla standards ta’ protezzjoni tad-data u privatezza. 

Il-vjaġġaturi affettwati mir-regoli l-ġodda jistgħu jsibu informazzjoni dettaljata dwar il-proċeduri l-ġodda fuq is-sit web Uffiċjali dwar l-Ivvjaġġar tal-Ewropa qabel ma jidħlu fiż-żona Schengen. 

Din is-sistema l-ġdida se tiġi implimentata progressivament fuq perjodu ta’ sitt xhur. Matul dan iż-żmien, il-pajjiżi tal-UE se jkunu jistgħu jiddeċiedu meta u fejn jibdew jużaw is-sistema fil-qsim tal-fruntieri tagħhom. 

L-introduzzjoni gradwali se tgħin lill-awtoritajiet tal-fruntieri, lill-industrija tat-trasport u lill-vjaġġaturi jadattaw mingħajr xkiel għall-proċeduri l-ġodda. Mill-10 ta’ April 2026,  is-sistema se tkun kompletament operattiva fil-punti kollha ta’ qsim tal-fruntieri esterni, u uffiċjalment se tissostitwixxi l-ittimbrar tal-passaporti b’rekords elettroniċi.

It-tisħiħ tal-fruntieri komuni tal-UE huwa prijorità ewlenija għall-Kummissjoni. Bid-dħul fis-seħħ tas-Sistema ta’ Dħul/Ħruġ tal-aħbarijiet, il-kontroll tal-fruntieri mhux biss se jsir aktar sigur, iżda aktar effiċjenti u konvenjenti għall-persuni kollha li jidħlu fl-UE u joħorġu minnha.

Għal aktar tagħrif

Stqarrija għall-istampa — Is-Sistema ta’ Dħul/Ħruġ tal-UE tibda topera progressivament fit-12 ta’ Ottubru 2025

Sistema ta’ Dħul/Ħruġ (EES, Entry/Exit System)

Era ġdida għad-difiża u s-sigurtà tal-Ewropa