Minħabba t-tibdil fil-klima, in-nirien fis-selvaġġ qed isiru aktar spissi u aktar qerrieda. Fl-2025 biss, madwar l-UE inħarqu f’nirien fis-selvaġġ rekord ta’ miljun ettaru ta’ art - jiġifieri art madwar nofs id-daqs tas-Slovenja. B’reazzjoni għal dan, dan is-sajf l-UE se jkollha għal-lest għadd rekord ta’ ħaddiema tat-tifi tan-nar, mezzi tal-ajru, u esperti fil-qasam tal-emerġenzi biex tikkontribwixxi għall-protezzjoni tal-ħajjiet, tad-djar, u tan-natura.
Qabel l-istaġun tan-nirien fis-selvaġġ tas-sajf, l-UE saħħet il-miżuri ta’ tħejjija tagħha biex tappoġġa lill-pajjiżi fi ħdanha.
- 777 ħaddiem tat-tifi tan-nar minn 14-il pajjiż se jiġu skjerati f’żoni ta’ riskju għoli f’6 pajjiż fin-Nofsinhar tal-Ewropa
- 22 ajruplan tat-tifi tan-nar u 5 ħelikopters mill-flotta tal-UE huma lesti biex jappoġġaw pajjiżi taħt pressjoni
- 21 tim iċċertifikat huma lesti biex jintervjenu madwar l-Ewropa kollha
Matul l-istaġun tan-nirien fis-selvaġġ, l-esperti fiċ-Ċentru ta’ Koordinazzjoni tar-Reazzjoni f’każ ta’ Emerġenza, appoġġati minn esperti addizzjonali tan-nirien fis-selvaġġ, se jsegwu r-riskji u jappoġġaw l-iskjeramenti 24/7 abbażi ta’ analiżi meteoroloġika u xjentifika. Is-Sistema Ewropea ta’ Informazzjoni dwar in-Nirien fil-Foresti se tipprovdi previżjonijiet kontinwi tar-riskju ta’ nirien fis-selvaġġ, filwaqt li s-servizzi satellitari tal-UE bħal Copernicus se jipprovdu mmappjar ta’ emerġenza u analiżi ġeospazjali biex jappoġġaw id-deċiżjonijiet fuq il-post.
Barra minn hekk, l-UE qed tniedi stazzjon reġjonali Ewropew ġdid għat-tifi tan-nar f’Ċipru biex issaħħaħ il-kapaċitajiet ta’ tħejjija u rispons għan-nirien fis-selvaġġ madwar l-Ewropa u r-reġjun tan-Nofsinhar tal-Mediterran. L-istazzjon se jkollu l-kapaċità li jippożizzjona minn qabel 6 mezzi tal-ajru u jospita taħriġ għall-prattikanti tal-protezzjoni ċivili.
Fi żminijiet ta’ kriżi, l-UE tinsab spalla ma’ spalla maċ-ċittadini tagħha billi tlaqqa’ flimkien ir-riżorsi, l-għarfien espert, u n-nies fuq il-post biex tipproteġi l-ħajjiet, il-komunitajiet u l-ambjent. Il-Mekkaniżmu tal-UE għall-Protezzjoni Ċivili u rescEU diġà jipprovdu appoġġ essenzjali lill-pajjiżi tal-UE permezz ta’ kapaċità ta’ tifi tan-nar mill-ajru u assistenza transfruntiera. Bl-approċċ il-ġdid għall-ġestjoni tar-riskju tan-nirien fis-selvaġġ ippreżentat f’Marzu 2026, il-Kummissjoni għandha l-għan li tkompli ssaħħaħ il-prevenzjoni, it-tħejjija, ir-rispons u l-irkupru min-nirien fis-selvaġġ madwar l-UE.
Għal iktar informazzjoni
- Data tal-pubblikazzjoni
- 2 Ġunju 2026
- Awtur
- Id-Direttorat Ġenerali għall-Komunikazzjoni