Il-Kummissjoni Ewropea adottat proposti ġodda li se jnaqqsu l-burokrazija u jissimplifikaw ir-regoli tal-UE għaċ-ċittadini u n-negozji. Fil-Boxxla għall-Kompetittività reċenti, il-Kummissjoni stabbiliet il-viżjoni tagħha biex tagħmel l-ekonomija tal-UE aktar prospera u kompetittiva, filwaqt li tibni fuq ir-rakkomandazzjonijiet tar-rapport ta’ Draghi. Biex terġa’ tinkiseb il-kompetittività u jiġi sfruttat it-tkabbir, hemm bżonn li l-UE trawwem ambjent tan-negozju favorevoli u tiżgura li l-kumpaniji jkunu jistgħu jirnexxu.
L-ewwel żewġ pakketti ta’ miżuri ta’ simplifikazzjoni, l-hekk imsejħa pakketti Omnibus, għandhom l-għan li jiksbu dan. Il-miżuri se jiffukaw fuq l-obbligi ta’ rapportar dwar is-sostenibbiltà għall-akbar kumpaniji li x’aktarx ikollhom l-akbar impatti fuq in-nies u l-ambjent, u jiżguraw li ma jkunux ta’ piż fuq kumpaniji iżgħar.
Dan l-ewwel pakkett ikopri passi lejn:
- Aktar aċċessibbiltà u effiċjenza tar-rapportar dwar is-sostenibbiltà
- Is-simplifikazzjoni tad-diliġenza dovuta biex jiġu appoġġati prattiki kummerċjali responsabbli
- It-tisħiħ tal-mekkaniżmu ta’ aġġustament tal-karbonju fil-fruntieri għal kummerċ aktar ġust
- L-isfruttar tal-opportunitajiet fil-programmi ta’ investiment Ewropej
Il-proposti issa se jiġu ppreżentati lill-Parlament Ewropew u lill-Kunsill għall-kunsiderazzjoni u l-adozzjoni tagħhom.
Fil-programm ta’ ħidma tagħha għall-2025, il-Kummissjoni ħabbret sensiela ta’ miżuri biex tindirizza regoli li jikkoinċidu, mhux meħtieġa jew sproporzjonati li joħolqu ostakli għall-kumpaniji tal-UE. B’mod kollettiv, b’dawn il-miżuri, il-Kummissjoni trid tnaqqas il-piżijiet amministrattivi b’25%, u b’35% għan-negozji żgħar u ta’ daqs medju, sa tmiem il-mandat tagħha fl-2029.
Għal aktar informazzjoni
Mistoqsijiet u Tweġibiet - Il-pakkett Omnibus
Is-simplifikazzjoni tar-regoli tal-UE u t-tisħiħ tal-kompetittività – Omnibus I
InvestEU - L-Unjoni Ewropea – Omnibus II
- Data tal-pubblikazzjoni
- 26 Frar 2025
- Awtur
- Id-Direttorat Ġenerali għall-Komunikazzjoni