Bratach na hEorpa

Siombail ár n-aontachta

Tá bratach na hEorpa ar cheann de na siombailí is aitheanta san Eoraip agus ar fud an domhain.

Le breis agus 40 bliain, tá an bhratach ag spreagadh na milliún daoine ar fud na mór-roinne teacht le chéile agus oibriú i dtreo spriocanna coiteanna.

Is siombail í ár mbratach de luachanna na haontachta, na síochána, an daonlathais agus na dlúthpháirtíochta. Léiríonn sí freisin ár gcomhfhéiniúlacht atá cruthaithe ag an gcoinbhleacht agus ag an deighilt leis na céadta bliain anuas, agus ag na deiseanna agus an todhchaí choiteann atá romhainn. 

Sa lá atá inniu ann, tá bratach na hEorpa i gcroílár shainaitheantas físiúil an Choimisiúin freisin; tá an bhratach cháiliúil le feiceáil i gcroílár a lógó oifigiúil.

Photo of Jacques Delors greeting people with EU flags in front of the Berlaymont building — An Bhruiséil, an 29 Bealtaine 1986: Nochtadh oifigiúil bhratach na hEorpa os comhair fhoirgneamh Berlaymont leis an Uachtarán Jacques Delors

An raibh an méid seo ar eolas agat?

Ciorcal na réaltaí ar dhath an óir
is don aontacht, don dlúthpháirtíocht agus don tsíocháin i measc mhuintir na hEorpa a sheasann siad
12 réalta
is don fhoirfeacht agus don iomláine a sheasann siad, agus ní don líon Ballstát atá ann
Ór agus gorm
sin iad an dá dhath amháin atá ar an mbratach

Stair achomair bhratach na hEorpa

An rud a ndéanfaí bratach na hEorpa de faoi dheireadh, tosaíodh á úsáid mar bhratach Chomhairle na hEorpa in 1955. Tríocha bliain ina dhiaidh sin in 1985, chinn na hinstitiúidí Eorpacha an bhratach chéanna sin a ghlacadh mar bhratach na hEorpa. An 29 Bealtaine 1986 ardaíodh bratach na hEorpa den chéad uair lasmuigh d’fhoirgneamh Berlaymont sa Bhruiséil, ceanncheathrú an Choimisiúin Eorpaigh.

Daichead bliain níos déanaí, is léiriú í bratach na hEorpa ar ardmhianta na milliún Eorpach le haghaidh mór-roinn atá aontaithe sa tsíocháin, sa rathúnas agus sa mheas ar dhínit an duine. Coinnímis ar foluain í le bród.

Nollaig 1955
Ghlac Comhairle na hEorpa, eagraíocht idirnáisiúnta um chearta an duine atá éagsúil ón Aontas Eorpach, an bhratach mar shuaitheantas oifigiúil di féin.
Aibreán 1983
Mhol Parlaimint na hEorpa an bhratach a ghlacadh le haghaidh na gComhphobal Eorpach, as a n-eascródh an tAontas Eorpach ina dhiaidh sin.
Meitheamh 1985
Ghlac an Chomhairle Eorpach dearadh na brataí Eorpaí do na Comhphobail Eorpacha, agus stádas oifigiúil lógó aige.
Bealtaine 1986
Ardaíodh bratach na hEorpa den chéad uair lasmuigh d’fhoirgneamh an Berlaymont, ceanncheathrú an Choimisiúin Eorpaigh sa Bhruiséil.
Eanáir 2002
Cuireadh an euro i gcúrsaíocht mar nótaí bainc agus boinn i 12 cheann de thíortha an Aontais. Cuireadh an bhratach ar nótaí bainc euro mar shiombail den fhéiniúlacht Eorpach.
Samhain 2015
Eisíodh bonn comórtha euro chun 30 bliain a chomóradh ó ghlac an tAontas an bhratach.

‘Cuirimis dathanna na hEorpa ar foluain, agus go raibh an bhratach ghorm agus óir seo ina siombail dóchais dá saoránaigh uile, siombail a chothaítear de shíor lenár n-idéal agus lenár gcomhrac.’ 

Jacques Delors, Uachtarán an Choimisiúin Eorpaigh, ag labhairt dó ag searmanas ardaithe na brataí an 29 Bealtaine 1986

Na háiteanna a bhfeictear an bhratach sa lá atá inniu ann

I do shaol laethúil, bíonn an bhratach le feiceáil in go leor áiteanna:

os comhair hallaí baile, foirgnimh rialtais, institiúidí, comhlachtaí agus gníomhaireachtaí an Aontais, ollscoileanna, cearnóga poiblí, agus ionadaíochtaí taidhleoireachta
ar cheann den iliomad tionscadal agus tionscnamh a dtacaíonn an tAontas leo, nó ar chuir an tAontas tacaíocht ar fáil dóibh in am an ghátair nó i gcás tubaiste, i dtíortha den Aontas agus ar fud an domhain
ar do phas agus ar na nótaí euro i do sparán
ag comórtais idirnáisiúnta spóirt, cuir i gcás Corn Laver na leadóige, Corn Ryder an ghailf, Sraith Seaimpíní UEFA nó Cluichí Oilimpeacha Pháras 2024
lasmuigh den Aontas Eorpach, áit a gcrochann go leor daoine í ar son a bhfuil i gceist léi. Ón Úcráin in 2014 go dtí an tSeoirsia in 2024 tá an bhratach in airde go cróga ag go leor daoine, iad ag iarraidh a náisiún a thabhairt níos gaire don tionscadal Eorpach.