Tosaíochtaí agus luachanna an Aontais Eorpaigh sa chóras iltaobhach
Mar gheall ar dhúshláin an 21ú haois, tá gá le níos mó rialachas iltaobhach agus comhar idirnáisiúnta riailbhunaithe, seachas níos lú de.
Tá tosaíochtaí straitéiseacha soiléire sainithe ag an Aontas i leith saincheisteanna nach féidir le tír ar bith aghaidh a thabhairt orthu aisti féin: an tsíocháin agus an tslándáil, cearta an duine agus an smacht reachta, an fhorbairt inbhuanaithe, an tsláinte phoiblí, nó an aeráid.
Anois ní mór don Aontas na tosaíochtaí sin a chur chun tosaigh go hiltaobhach i gcur chuige straitéiseach chun domhan níos sábháilte agus téarnamh inbhuanaithe cuimsitheach domhanda a chinntiú.
Ní mór don Aontas dlús a chur lena cheannaireacht agus ‘beart a dhéanamh mar aon aonad amháin’ ionas go n-éireoidh leis ‘mar aon aonad amháin’. Chuige sin, cuirfidh an tAontas sásraí comhordaithe níos éifeachtúla chun cinn i ndáil le tosaíochtaí comhpháirteacha agus bainfidh sé úsáid níos fearr as a neart comhchoiteann, agus forbairt a dhéanamh ar chur chuige Team Europe san áireamh. Na láidreachtaí rialála daonlathacha agus uathúla atá aici, is sócmhainní iad chun domhan níos fearr a fhorbairt, agus ag an am céanna tacaíonn a struchtúir slándála agus cosanta leis na hiarrachtaí atá á ndéanamh ar fud an domhain chun an tsíocháin agus an tslándáil idirnáisiúnta a chaomhnú, a fhothú agus a fhorbairt.
An tAontas Eorpach ag an mbord caibidlíochta
Leanfaidh an tAontas de thacaíocht a thabhairt do nuachóiriú an chórais iltaobhaigh, agus iarrachtaí athchóirithe Ardrúnaí na Náisiún Aontaithe san áireamh, chomh maith le hathchóiriú na hEagraíochta Domhanda Sláinte agus na hEagraíochta Domhanda Trádála.
Forbróidh an tAontas comhghuaillíochtaí nua le tríú tíortha, neartóidh sé an comhar le heagraíochtaí iltaobhacha agus réigiúnacha, mar aon le páirtí leasmhara eile.
