Ceannaireacht na hEorpa i réimse na hintleachta saorga a mhúnlú le plean gníomhaíochta um mór-roinn na hintleachta saorga

Príomhghníomhaíochtaí an phlean gníomhaíochta um mór-roinn na hintleachta saorga

Agus é ag tógáil ar sheoladh thionscnamh InvestAI lena slógfar €200 billiún le haghaidh infheistíocht san IS san Aontas, is é is aidhm don phlean gníomhaíochta um mór-roinn na hintleachta saorga feabhas a chur ar ár gcumais IS, trí thionscnaimh a chur chun cinn i gcúig phríomhréimse.

Bonneagar mórscála ríomhaireachta IS a thógáil

Teastaíonn infheistíocht, bonneagar agus comhoibriú ó ardsamhlacha IS. Lenár bplean, tabharfar le chéile na gnéithe is gá chun cabhrú le gnólachtaí Eorpacha an barr a rugadh ar IS tríd an méid seo a leanas a dhéanamh:

• 19 mhonarcha IS ar a laghad a chur ar bun ar fud na hEorpa, agus úsáid á baint as ár líonra sár-ríomhaireachta ceannródaíoch domhanda. Tacóidh na monarchana sin le gnólachtaí nuathionscanta, an tionscal agus taighdeoirí chun samhlacha agus feidhmchláir cheannródaíocha IS a fhorbairt
• suas le 5 ghigeamhonarcha IS a bhunú, a bheidh mar shaoráidí mórscála le cumhacht ollmhór ríomhaireachta acu agus lárionaid sonraí. A bhuí leo, beifear in ann samhlacha casta IS a oiliúint ar scála nach bhfacthas a leithéid riamh roimhe seo. Chun an tionscnamh sin a fhíorú, tá gá le hinfheistíocht phoiblí agus phríobháideach araon, agus daingneoidh sé ceannaireacht an Aontais in IS cheannródaíoch
• saoráid InvestAI a bhfuil sé d’aidhm aici €20 billiún a shlógadh, chun infheistíocht phríobháideach a spreagadh i ngigeamhonarchana
• an gníomh um fhorbairt na néalríomhaireachta agus na hintleachta saorga a mholadh lena gcuirfear borradh faoin infheistíocht i lárionaid néalríomhaireachta agus sonraí. Is é an sprioc atá ann acmhainneacht lárionaid sonraí an Aontais a mhéadú faoi thrí ar a laghad as seo go ceann 5 go 7 mbliana, agus tús áite á thabhairt d’ionaid sonraí inbhuanaithe.
   

Rochtain a mhéadú ar shonraí ar ardchaighdeán

Tá tacair sonraí mhóra ar ardchaighdeán fíor-riachtanach chun ardsamhlacha IS a fhorbairt agus a oiliúint. Cruthóimid na dálaí le haghaidh margadh aonair do shonraí tríd an méid seo a leanas a dhéanamh:

• an straitéis um aontas sonraí atá ar na bacáin, lena gcothófar fíormhargadh inmheánach le haghaidh sonraí, lena gcumasófar forbairt IS a mhéadú ar fud an Aontais.
• saotharlanna sonraí laistigh de mhonarchana IS chun sonraí ar ardchaighdéan ó fhoinsí éagsúla a bhailiú agus a eagrú. Tabharfaidh sé sin na huirlisí is gá do thaighdeoirí agus d’fhorbróirí chun nuáil a dhéanamh.

An Intleacht Shaorga a chur chun cinn in earnálacha straitéiseacha

Faoi láthair, ní bhaineann ach 13.5% de chuideachtaí an Aontais úsáid as IS. Chun an bhearna sin a dhúnadh, sheol an Coimisiún an straitéis um chur i bhfeidhm na hintleachta saorga. Déanfar an méid seo a leanas leis an straitéis:

• borradh a chur faoi ghlacadh na hintleachta saorga, go háirithe i measc FBManna agus cuideachtaí meánchaipitlithe beaga
• comhtháthú IS a éascú chun iomaíochas na dtionscal straitéiseach a fheabhsú
• tairbhí sochaíocha níos leithne na hintleachta saorga a scaoileadh
• cumais an Aontais a neartú agus barr feabhais a bhaint amach san intleacht shaorga cheannródaíoch.

Scileanna agus tallann IS a neartú

Chun freastal ar an éileamh méadaitheach ar thallann IS, déanfaimid an méid seo a leanas: 

• oideachas agus oiliúint a chur ar an gcéad ghlúin eile de shaineolaithe IS atá lonnaithe san Aontas
• tallann IS na hEorpa a dhreasú chun fanacht agus filleadh ar an Aontas.
• tallann oilte IS ó thíortha nach Ballstáit den Aontas iad a mhealladh agus a choinneáil, taighdeoirí ina measc. 

Cur i bhfeidhm an ghnímh um an intleacht shaorga a shimpliú

Tá an Coimisiún ag tacú le cuideachtaí agus le tíortha an Aontais chun an Gníomh um an Intleacht Shaorga a chur i bhfeidhm. Chuige sin, tá treoirlínte foilsithe aige cheana féin maidir le cleachtais IS atá toirmiscthe agus tá sé ag cuidiú chun cóid chleachtais a fhorbairt. Is mol lárnach í Deasc Seirbhíse an Ghnímh um an Intleacht Shaorga, lena gcuirtear eolas ábhartha ar fáil chun cabhrú le páirtithe leasmhara a chinneadh an dtagann siad faoi oibleagáidí dlíthiúla sonracha.