Gníomhú ar son na haeráide agus an Comhaontú Glas

Chun ár gcuspóirí maidir le dícharbónú a bhaint amach, ní mór astaíochtaí a laghdú i ngach earnáil, ón tionscal agus an fuinneamh go dtí an t-iompar agus an talmhaíocht. Bagraíonn an t-athrú aeráide ar an domhan i gcoitinne, agus tá gá le freagairt dhomhanda chun aghaidh a thabhairt air. Is é sin an fáth a n-oibríonn agus a dtacaíonn an tAontas le comhpháirtithe idirnáisiúnta maidir le gníomhaíocht ar son na haeráide, go háirithe trí Chreat-Choinbhinsiún na Náisiún Aontaithe ar an Athrú Aeráide agus Comhaontú Pháras. I gcomhthreo le gníomhaíochtaí maolúcháin, tá an tAontas ag déanamh bearta maidir le hoiriúnú don athrú aeráide chun aghaidh a thabhairt ar thionchair dhosheachanta an athraithe aeráide.

I mí Feabhra 2024 chuir an Coimisiún i láthair sprioc aeráide 2040 idirmheánach don Aontas. Ach glanastaíochtaí gás ceaptha teasa a laghdú 90% faoi 2040 i gcomparáid le leibhéil 1990, chinnteofaí gur féidir leis an Aontas a ghealltanas a chomhlíonadh maidir le bheith aeráidneodrach faoi 2050. Tá an sprioc sin á plé anois ag Parlaimint na hEorpa agus na Ballstáit. Cuirfidh an chéad Choimisiún eile tograí reachtacha ar aghaidh ar an mbonn sin.

Tuilleadh eolais maidir le gníomhaíocht an Aontais maidir leis an aeráid

Chuaigh an Coimisiún féin isteach sa Chomhshocrú Aeráide Eorpach agus thug sé gealltanas a gcuid oibríochtaí a dhéanamh aeráidneodrach faoi 2030. I dTeachtaireacht agus i bPlean Gníomhaíochta an Choimisiúin maidir leis an gCoimisiún a Ghlasú, rud a glacadh i mí Aibreáin 2022, gheall sé laghdú 60% ar a laghad a dhéanamh de réir a chéile ar a astaíochtaí gás ceaptha teasa i gcomparáid le leibhéil 2005, agus aon astaíochtaí atá fágtha in 2030 a chúiteamh le haistrithe carbóin deimhnithe ar ardchaighdeán.