An Chomhdháil ar Thodhchaí na hEorpa

An chaoi ar cuireadh tús leis

Ba shraith díospóireachtaí agus pléite a bhí faoi stiúir na saoránach í an Chomhdháil ar Thodhchaí na hEorpa a reáchtáladh ó mhí Aibreáin 2021 go dtí mí na Bealtaine 2022, rud a chuir ar chumas daoine as gach cearn den Eoraip a gcuid smaointe a chomhroinnt agus cabhrú chun ár dtodhchaí choiteann a mhúnlú.

Ní raibh Comhdháil dá leithéid riamh roimhe: mar ghníomhaíocht dhaonlathach, le díospóireachtaí atá faoi stiúir na saoránach a chuirfidh ar chumas daoine as gach cearn den Eoraip a gcuid smaointe a roinnt agus cabhrú linn ár dtodhchaí choiteann a mhúnlú. Rinneadh sin trí Ardán Digiteach Ilteangach nuálach ar a raibh saoránach Eorpach ar bith in ann smaointe a chomhroinnt, agus trí phainéil náisiúnta agus trí Phainéil Saoránach Eorpach araon.

Agus níos mó ná 5 mhilliún cuairteanna uathúla tugtha ar an ardán agus breis agus 700,000 duine tar éis freastal ar na himeachtaí, d’éirigh leis an gComhdháil fóram poiblí a chruthú le haghaidh díospóireacht oscailte chuimsitheach thrédhearcach leis na saoránaigh maidir le roinnt príomhthosaíochtaí agus príomhdhúshlán.

Tuilleadh eolais maidir le suíomh gréasáin na Comhdhála ar Thodhchaí na hEorpa (cartlannaithe)

Tar éis aistear eisceachtúil a mhair ar feadh bliana agus a bhí líon lán de phléití, de phlé agus de chomhoibriú idir saoránaigh as gach cearn den Eoraip i dtaca leis an gcineál Eoraip ar mhaith leo cónaí inti, tháinig deireadh oifigiúil leis an gComhdháil ar Thodhchaí na hEorpa an 9 Bealtaine 2022 – Lá na hEorpa – in Strasbourg. An lá sin, chuir Comhchathaoirligh Bhord Feidhmiúcháin na Comhdhála tuarascáil deiridh i láthair ina raibh 49 dtogra chuig Uachtarán Pharlaimint na hEorpa, Uachtarán na Comhairle agus Uachtarán an Choimisiúin.  

Chlúdaigh na tograí sin 9 n-ábhar: an t-athrú aeráide agus an comhshaol; sláinte; geilleagar níos láidre, ceartas sóisialta agus poist; an tAontas sa domhan mór; luachanna agus cearta, an smacht reachta, slándáil; an claochlú digiteach; an daonlathas Eorpach; an imirce; an t-oideachas, an cultúr, an óige agus an spórt. Áiríodh iontu cuspóirí ginearálta agus níos mó ná 300 beart nithiúil, agus tá scrúdú á dhéanamh anois ag na trí institiúid ar an dóigh ar féidir obair leantach éifeachtach a dhéanamh orthu, gach ceann acu laistigh dá réimsí inniúlachtaí féin agus i gcomhréir leis na Conarthaí.

An 17 Meitheamh d’fhoilsigh an Coimisiún Teachtaireacht ina bhfuil measúnú mionsonraithe ar a bhfuil ag teastáil chun obair leantach a dhéanamh ar thograí na Comhdhála. Tugann sé forléargas ar na chéad chéimeanna eile agus leagtar amach inti conas is fearr foghlaim ón gComhdháil agus an daonlathas rannpháirteach a leabú i gceapadh beartais agus dlíthe an Aontais. Mar shampla, ag tógáil ar rath na bPainéal Eorpach ó na Saoránaigh, cuirfidh an Coimisiún ar chumas na bpainéal sin moltaí a phlé agus moltaí a dhéanamh roimh phríomhthograí áirithe, mar chuid dá cheapadh beartais níos leithne agus i gcomhréir le prionsabail na Rialála Níos Fearr. Painéal saoránach den chéad ghlúin eile maidir le conas dlús a chur le bearta chun cur amú bia san Aontas a laghdú, tá sin á eagrú ag an gCoimisiún faoi láthair.

Painéil saoránach Eorpach

D’fhógair an tUachtarán von der Leyen an chéad tacar de thograí nua san aitheasc ar Staid an Aontais i mí Mheán Fómhair 2022, agus sa Litir Intinne a ghabhann leis. Cuireadh na tograí sin san áireamh freisin i gclár oibre 2023 an Choimisiúin. Chun na saoránaigh a ghlac páirt sa Chomhdháil a choimeád ar an eolas agus chun an móiminteam a choinneáil, eagraíodh ócáid aiseolais i mí na Nollag 2022. Deis a bhí san imeacht sin míniú a thabhairt do na saoránaigh faoin obair leantach atá á déanamh ag na trí institiúid de chuid an Aontais maidir leis na tograí ón gComhdháil.

Ba chuid den ghealltanas a thug an tUachtarán von der Leyen go mbeidh tionchar níos mó ag muintir na hEorpa ar a ndéanann an tAontas Eorpach agus ar an gcaoi a n-oibríonn sé dóibh. Cuireadh fáilte roimh gach duine san Eoraip páirt a ghlacadh ann – is cuma cérbh iad féin ná cén áit a raibh siad.

Bhí sé d’aidhm ag an gComhdháil ár n-éagsúlacht a léiriú agus an Eoraip atá lasmuigh de na príomhchathracha a chur i lár an aonaigh freisin. Ba mhian linn go mbeadh gach cearn den Aontas Eorpach páirteach agus go neartófaí an nasc idir muintir na hEorpa agus na hinstitiúidí a fhreastalaíonn orthu. Rinneadh é sin tríd an iliomad comhdhálacha agus díospóireachtaí a eagrú ar fud an Aontais, agus trí ardán digiteach ilteangach idirghníomhach. Agus d’éirigh leis sin: faoi mhí na Bealtaine 2022, thug beagnach 5 mhilliún cuairteoir aonair cuairt ar an ardán agus ghlac os cionn 50,000 rannpháirtí páirt i 18,000 plé agus breis is 6,500 imeacht a cláraíodh.  

Spreagadh daoine óga go háirithe chun bheith páirteach ann agus chun a gcuid smaointe a roinnt. Údaráis Eorpacha, náisiúnta, réigiúnacha agus áitiúla, chomh maith leis an tsochaí shibhialta agus eagraíochtaí eile, bhí siadsan in ann imeachtaí a eagrú freisin, imeachtaí ina raibh an líon is mó daoine is féidir páirteach iontu.

 

 

 

 

 

 

 

Bileoga eolais