Unjoni tat-Tfaddil u l-Investimenti: opportunitajiet finanzjarji aħjar għaċ-ċittadini u n-negozji tal-UE

Il-Kummissjoni adottat strateġija ġdida biex tidderieġi t-tfaddil f’investimenti produttivi. Hija tfittex li żżid il-parteċipazzjoni taċ-ċittadini tal-UE fis-swieq kapitali b’għażliet ta’ investiment usa’ u litteriżmu finanzjarju mtejjeb, trawwem il-ġid tagħhom u tagħti spinta lill-ekonomija tal-UE. 

Madwar 70 % tat-tfaddil tal-unitajiet domestiċi fl-UE — b’valur ta’ EUR 10 triljun— jinżamm bħala depożiti bankarji. Id-depożiti bankarji huma sikuri u faċli biex jiġu aċċessati, iżda dawn normalment jaqilgħu inqas flus minn investimenti fi swieq kapitali. L-istrateġija l-ġdida tista’ tappoġġja liċ-ċittadini tal-UE biex isawru l-ġid tal-unitajiet domestiċi tagħhom u jiffrankaw aħjar għall-futur. Bis-saħħa tal-unjoni tat-tfaddil u l-investimenti, iċ-ċittadini li jixtiequ jinvestu jkollhom opportunitajiet aħjar biex jinvestu fis-swieq kapitali. Dan ifisser li jkun hemm aċċess faċli, sempliċi u bi prezz baxx għal varjetà wiesgħa ta’ opportunitajiet ta’ investiment. 

Aktar investimenti fis-swieq kapitali jappoġġaw l-ekonomija billi jippermettu lill-kumpaniji tal-UE jikbru u jirnexxu. Dan jista’ joħloq impjiegi aħjar b’salarji ogħla għall-ħaddiema, u jixpruna l-investiment u t-tkabbir fis-setturi ekonomiċi kollha. 

Fl-aħħar nett, għandha wkoll l-għan li ssaħħaħ l-integrazzjoni u l-kompetittività tas-settur bankarju tal-UE, inkluż permezz tal-approfondiment tal-unjoni bankarja.  

L-istituzzjonijiet tal-UE, il-pajjiżi tal-UE, u l-partijiet ikkonċernati ewlenin kollha se jkollhom jaħdmu flimkien biex jiksbu l-unjoni tat-tfaddil u tal-investimenti. L-istrateġija se tiġi żviluppata aktar, u se jittieħdu miżuri f’oqsma speċifiċi biex tingħata spinta lill-kompetittività fl-ekonomija tal-UE, b’enfasi qabelxejn fuq l-aktar azzjonijiet li jħallu impatt fl-2025. 

L-UE jeħtiġilha tisfrutta l-potenzjal tagħha biex tikseb l-għanijiet tagħha fir-rigward tal-kompetittività, is-sigurtà u t-tranżizzjonijiet diġitali u ekoloġiċi. Bl-iżvilupp ta’ sistema bankarja u swieq kapitali integrati, l-unjoni tat-tfaddil u l-investimenti tista’ tnaqqas id-distakk bejn il-ħtiġijiet tat-tfaddil u tal-investiment. 

Għal aktar informazzjoni 

Il-kompetittività 

Stqarrija għall-istampa: unjoni tat-tfaddil u l-investimenti 

Mistoqsijiet u Tweġibiet: unjoni tat-faddil u l-investimenti 

Skeda informattiva: unjoni tat-faddil u l-investimenti