Plean nua chun leas a bhaint as acmhainneacht an bhithgheilleagair

Cuireann bithgheilleagar an Aontais go mór cheana féin le cruthú post agus le fás eacnamaíoch san Eoraip. Fostaíonn sé níos mó ná 17 milliún duine (thart ar 8% de phoist an Aontais) agus ba luach €2.7 trilliún a bhí air in 2023. Lena straitéis nua don bhithgheilleagar, tá sé d’aidhm ag an Aontas leas breise a bhaint as acmhainneacht an bhithgheilleagair chun cabhrú leis ábhair agus táirgí iontaise-bhunaithe a athsholáthair, poist a chruthú agus a bheith ar thús cadhnaíochta san aistriú domhanda chuig tionscail ghlana.  

Díorthaítear táirgí bithbhunaithe ó acmhainní bitheolaíocha ar talamh agus san fharraige. Is féidir ceimiceáin bhithbhunaithe, mar shampla, a dhéanamh as algaí a úsáidtear chun cógaisíocht agus táirgí cúraim phearsanta a tháirgeadh agus i bhfeidhmeanna tionsclaíocha. Úsáidtear plaistigh bhithbhunaithe i bpacáistíocht agus i bpáirteanna mótarfheithiclí. Agus tá méadú ag teacht de shíor ar an éileamh ar tháirgeadh tógála bithbhunaithe, ar shnáithíní teicstíle agus ar leasacháin.  

Tacóidh an Straitéis nua atá beartaithe le gníomhaíochtaí lena soláthraítear réitigh phraiticiúla inbhuanaithe agus roghanna malartacha ar amhábhair chriticiúla trí úsáid a bhaint as ár n-acmhainní bitheolaíocha ar na bealaí seo a leanas: 

Nuálaíochtaí bithbhunaithe a chur i gcrích ar an láthair 

• nuálaíochtaí bithbhunaithe a uas-scálú trí úsáid a bhaint as meascán d’infheistíochtaí poiblí agus príobháideacha, chomh maith le timpeallacht rialála chuíchóirithe
• formheasanna níos tapúla, níos soiléire agus níos simplí a chinntiú le haghaidh réitigh nuálacha, go háirithe do ghnólachtaí beaga
• infheistíocht a dhéanamh i dteicneolaíochtaí bithbhunaithe agus grúpa imscartha infheistíochta bithgheilleagair a bhunú chun infheistíocht phríobháideach a spreagadh 

Príomh-mhargaí a fhorbairt le haghaidh ábhair agus teicneolaíochtaí bithbhunaithe 

• borradh a chur faoin éileamh ar ábhar bithbhunaithe i dtáirgí, mar shampla, trí spriocanna a leagan síos sa reachtaíocht ábhartha
• comhghuaillíocht Eorpach bhithbhunaithe a chur ar bun, lena dtabharfaí le chéile cuideachtaí an Aontais chun réitigh bhithbhunaithe a cheannach i dteannta a chéile 

Úsáid inbhuanaithe bithmhaise a chinntiú 

• ciorclaíocht a chur chun cinn agus luach na bithmhaise tánaistí a fheabhsú – cuir i gcás iarmhair talmhaíochta, seachtháirgí, agus dramhaíl orgánach
• tionscnaimh a chur ar bun lena dtugtar luach saothair d’fheirmeoirí agus d’fhoraoiseoirí a chosnaíonn ithreacha, a fheabhsaíonn linnte carbóin agus a thacaíonn le húsáid bithmhaise inbhuanaithe 

Deiseanna domhanda a thapú 

• tacú le tionscal na hEorpa rochtain a fháil ar mhargaí domhanda trí chomhpháirtíochtaí a dhaingniú lena laghdaítear leochaileacht agus lena gcinntítear nach mbeidh an Eoraip ag brath ar réigiún aonair ná ar acmhainn aonair 

Cuireann an straitéis nua le Straitéis Bhithgheilleagair 2012 agus leis na hathbhreithnithe a rinneadh in 2018 agus 2022, lena ndírítear an fócas i dtreo cur in úsáid tionsclaíoch, uas-scálú margaidh, iomaíochas agus athléimneacht. 

Tuilleadh eolais 

Bileog eolais 

Straitéis Bhithgheilleagair – Comhshaol – An Coimisiún Eorpach 

Na fíricí faoin mbithgheilleagar – An Coimisiún Eorpach 

5 rud is gá a bheith ar eolas agat faoin mbithgheilleagar – An Comhshaol 

Preaseisiúint: Chuir an Coimisiún Straitéis Bhithgheilleagair nua i láthair chun borradh a chur faoin bhfás glas, faoin iomaíochas agus faoin athléimneacht ar fud na hEorpa