Treoir eacnamaíoch nua chun borradh a chur faoi iomaíochas an Aontais

Tá pacáiste an fhómhair den Seimeastar Eorpach 2026 glactha ag an gCoimisiún, ina leagtar amach tosaíochtaí beartais eacnamaíoch agus fostaíochta arb é is aidhm dóibh borradh a chur faoin iomaíochas. Dírítear sa phacáiste ar thacú le fás, táirgiúlacht, slándáil eacnamaíoch agus athléimneacht níos láidre agus airgeadas poiblí fónta á choinneáil ag an am céanna.

Cuireann an pacáiste seo le réamhaisnéis eacnamaíoch an fhómhair 2025, ina léirítear go bhfuil geilleagar an Aontais fós athléimneach agus fás measartha ann. Mar sin féin, tá dúshláin struchtúracha roimh an Aontas, amhail táirgiúlacht íseal, brú déimeagrafach, agus éilimh mhéadaitheacha ar airgeadas poiblí atá nasctha leis an gcosaint agus leis an aistriú chuig geilleagar dícharbónaithe digiteach. Dá bhrí sin, tá sé ríthábhachtach iomaíochas agus airgeadas poiblí fónta a neartú ar mhaithe le fás agus cobhsaíocht fhadtéarmach. 

Tá an méid seo a leanas mar chuid den phacáiste:

• Measúnú ar chomhlíonadh chreat fioscach agus threoir fhioscach an Aontais ag tíortha an Aontais chun a chinntiú go mbeidh a mbeartas fioscach in 2026 ailínithe leis na moltaí ón gComhairle
• An nuacht is déanaí maidir le nósanna imeachta um easnamh iomarcach, lena gcoinnítear an nós imeachta leanúnach ar oscailt do naoi dtír agus ceann amháin eile a oscailt
• Moladh i dtaca le beartas eacnamaíoch an limistéir euro do 2026, comhairle shaincheaptha san áireamh chun borradh a chur faoin táirgiúlacht agus chun an tslándáil eacnamaíoch a neartú
• Moladh i dtaca le caipiteal daonna chun dul i ngleic le dúshláin a dhéanann difear don iomaíochas, amhail an treocht dhiúltach i mbunscileanna agus an gá atá le hoideachas ETIM a neartú
• Tuarascáil faoin sásra foláirimh, uirlis scagtha bhliantúil an Aontais chun míchothromaíochtaí maicreacnamaíocha a d’fhéadfadh a bheith ann a bhrath go luath
• Tuarascáil mhaicreacnamaíoch Eorpach, ina dtugtar forléargas ar an limistéar euro agus ar gheilleagair an Aontais i dtimpeallacht dhomhanda atá ag athrú go tapa, ina ndéantar anailís ar na príomhrioscaí agus na príomhdheiseanna
• Tuarascálacha faireachais iarchláir chun measúnú a dhéanamh ar acmhainneacht aisíocaíochta na dtíortha a fuair cúnamh airgeadais
• Togra le haghaidh tuarascáil chomhpháirteach ar fhostaíocht, an anailís tíre chéad chéime ar an gcreat um chóineasú sóisialta san áireamh

Pléifidh an Grúpa Euro agus an Chomhairle ábhar an phacáiste sin anois, agus é mar aidhm acu é a fhormhuiniú, agus pléifidh an Coimisiún é leis an bParlaimint. Beidh an plé sin ina threoir do na chéad chéimeanna eile i dtimthriall an tSeimeastair Eorpaigh.

Le pacáiste an fhómhair 2026 cuirtear tús le timthriall nua den Seimeastar Eorpach. Tugtar forléargas cuimsitheach ann ar an staid fhioscach, eacnamaíoch agus shóisialta i dtíortha an Aontais, agus béim á leagan ar phríomhthosaíochtaí agus ar phríomhrioscaí. Cuireann sé treoir bheartais ar fáil freisin chun cuidiú le tíortha an Aontais na cuspóirí sin a bhaint amach. I mbliana, dírítear ar tháirgiúlacht, nuálaíocht agus infheistíocht a neartú, i gcomhréir leis an gCompás Iomaíochais.

Tuilleadh eolais

Preaseisiúint

Ceisteanna agus freagraí

Pacáiste an Fhómhair den Seimeastar Eorpach

Tuarascálacha tíre

Iomaíochas