F’kuntest ta’ inċertezza ekonomika globali, l-ekonomija tal-UE hija projettata li tikber b’mod moderat

Fit-tbassir ekonomiku tar-rebbiegħa 2025 li ppubblikat il-Kummissjoni Ewropea, jidher li l-ekonomija tal-UE bdiet din is-sena b’mod aktar b’saħħtu milli kien mistenni. Qed jiġi projettat li fl-2025 l-ekonomija se tkompli tikber bil-mod filwaqt li t-tkabbir mistenni jirpilja fl-2026.

Projezzjonijiet ewlenin

• il-PDG reali huwa projettat li jikber b’
  • 0.9 % fl-2025 u b’1.4 % fl-2026 fiż-żona tal-euro
  • 1.1 % fl-2025 u b’1.5 % fl-2026 fl-UE
• l-inflazzjoni mistennija tonqos
  • minn 2.4 % fl-2024 għal 2.1 % fl-2025 għal 1.7 % fl-2026 fiż-żona tal-euro
  • minn livell kemxejn ogħla fl-2024 għal ftit inqas minn 2 % fl-2026 fl-UE
• minħabba t-tnaqqis fir-ritmu tal-kummerċ globali, l-esportazzjonijiet tal-UE mistennija li jikbru b’0.7 % biss din is-sena, iżda se jżidu l-pass fl-2026 għal 2.1 %
• is-suq tax-xogħol għadu b’saħħtu, b’ħolqien rekord ta’ 1.7 miljun impjieg ġdid fl-ekonomija tal-UE fl-2024 u mistenni li jespandi b’2 miljun impjieg oħra
• ir-rata tal-qgħad mistennija tonqos għal livell storikament baxx ġdid ta’ 5.7 % fl-2026
• it-tkabbir fil-pagi nominali se jonqos fl-2025 u fl-2026, iżda l-ħaddiema se jkomplu jibbenefikaw minn żidiet fil-pagi reali. Huma mistennija wkoll li jirkupraw għalkollox il-kapaċità tal-akkwist li ntilfet fis-snin riċenti minħabba l-inflazzjoni
• id-defiċit tal-gvern estiż tal-UE huwa projettat li jiżdied marġinalment minn 3.2 % fl-2024 għal 3.3 % fl-2025 u li jibqa’ f’dak il-livell fl-2026

L-inċertezza għolja kaġun tat-tensjonijiet kummerċjali globali u d-diżastri relatati mal-klima joħolqu riskji negattivi għat-tkabbir. Madankollu, it-tnaqqis tat-tensjonijiet kummerċjali bejn l-UE u l-Istati Uniti, l-espansjoni tal-kummerċ, in-nefqa ogħla fid-difiża, u r-riformi biex tingħata spinta lill-kompetittività jistgħu jappoġġaw it-tkabbir u r-reżiljenza tal-ekonomija tal-UE.

It-tbassir li jmiss mistenni jiġi ppreżentat f’Novembru 2025. 

Għal aktar informazzjoni

Stqarrija għall-istampa: Tbassir ekonomiku tar-rebbiegħa 2025

Tbassir ekonomiku tar-rebbiegħa 2025

Tbassir ekonomiku 

Kompetittività