Biex jiġi żgurat li l-UE tibqa’ fit-triq it-tajba biex tilħaq l-ambizzjonijiet tagħha tat-trasformazzjoni diġitali, il-pajjiżi tal-UE jeħtieġu investimenti addizzjonali fil-ħiliet diġitali, konnettività ta’ kwalità għolja, u l-adozzjoni tal-Intelliġenza Artifiċjali. Dawn huma l-konklużjonijiet ewlenin tat-tieni rapport dwar l-Istat tad-Deċennju Diġitali, li jivvaluta l-progress li sar fil-kisba tal-objettivi u l-miri diġitali stabbiliti għall-2030 mill-Programm ta’ Politika tal-UE dwar id-Deċennju Diġitali. Ir-rapport janalizza wkoll il-pjanijiet direzzjonali strateġiċi nazzjonali tad-Deċennju Diġitali tal-pajjiżi tal-UE li jagħtu dettalji dwar il-miżuri nazzjonali ppjanati biex jikkontribwixxu għat-trasformazzjoni diġitali tal-UE. Sejba ewlenija tar-rapport hija l-ħtieġa li l-pajjiżi tal-UE jsaħħu l-azzjonijiet tagħhom u jkunu aktar ambizzjużi fil-kisba tal-għanijiet tad-Deċennju Diġitali li huma kruċjali biex tiġi żgurata l-prosperità ekonomika futura tal-UE. Ir-rapport jenfasizza li għad hemm lakuni notevoli fl-ilħuq ta’ ċerti miri. In-networks tal-fibra ottika jilħqu biss 64% tal-unitajiet domestiċi, filwaqt li n-networks 5G jilħqu biss 50% tat-territorju tal-UE u l-prestazzjoni tagħhom għadha insuffiċjenti biex tipprovdi servizzi avvanzati tal-5G. Bl-istess mod, l-adozzjoni tal-IA, tal-cloud u/jew tal-big data mill-kumpaniji Ewropej kellha skor ferm taħt il-mira tad-Deċennju Diġitali ta’ 75%. Skont ix-xejriet attwali, 64% biss tan-negozji se jużaw il-cloud, 50% big data u 17% biss tal-IA sal-2030. Biex jindirizzaw dawn in-nuqqasijiet, il-Kummissjoni u l-pajjiżi tal-UE għandhom jaħdmu flimkien biex irawmu Suq Uniku Diġitali verament funzjonali. Huma mħeġġa wkoll jinċentivaw l-adozzjoni ta’ għodod diġitali innovattivi minn negozji żgħar. Il-miri tal-ħiliet diġitali stabbiliti mid-Deċennju Diġitali għadhom ’il bogħod milli jintlaħqu, b’55.6% biss tal-popolazzjoni tal-UE li għandha mill-inqas ħiliet diġitali bażiċi. Ir-rapport jitlob lill-pajjiżi tal-UE jsegwu approċċ multidimensjonali biex irawmu l-ħiliet diġitali fil-livelli kollha tal-edukazzjoni, u jinċentivaw liż-żgħażagħ, b’mod partikolari l-bniet, biex jieħdu interess fix-xjenza, it-teknoloġija, l-inġinerija u l-matematika. Fuq nota aktar pożittiva, il-pajjiżi tal-UE qed jagħmlu progress lejn il-mira li jagħmlu s-servizzi pubbliċi ewlenin kollha u r-rekords elettroniċi tas-saħħa aċċessibbli online, kif ukoll jipprovdulhom identifikazzjoni elettronika sigura. Il-pajjiżi tal-UE issa se jkollhom jirrieżaminaw u jaġġustaw il-pjanijiet direzzjonali nazzjonali tagħhom biex jallineaw mal-ambizzjoni tal-Programm ta’ Politika dwar id-Deċennju Diġitali qabel it-2 ta’ Diċembru 2024. Il-Kummissjoni se timmonitorja u tivvaluta l-implimentazzjoni ta’ dawn ir-rakkomandazzjonijiet u tirrapporta dwar il-progress li sar fir-rapport li jmiss dwar l-Istat tad-Deċennju Diġitali fl-2025. Għal aktar informazzjoni Ewropa Lesta għall-Era Diġitali Id-Deċennju Diġitali tal-Ewropa Id-Deċennju Diġitali tal-Ewropa: miri diġitali għall-2030 Stqarrija għall-istampa: It-tieni rapport dwar l-Istat tad-Deċennju Diġitali jappella għal azzjoni kollettiva msaħħa biex tixpruna t-tranżizzjoni diġitali Dettalji Data tal-pubblikazzjoni3 Lulju 2024AwturId-Direttorat Ġenerali għall-Komunikazzjoni
