Ma tafx meta jista’ jdoqqlok it-telefown... Raġel kien bilqiegħda mal-mejda tal-kamra tal-ikel meta daħlitlu telefonata u ġie mistieden jipparteċipa f’panel taċ-ċittadini tal-UE dwar l-effiċjenza enerġetika. “Kellmuni dwar l-UE u Panel taċ-Ċittadini”. Huwa aċċetta l-istedina, u d-dibattitu fil-Panel imlieh b’entużjażmu għax “bdejt nagħraf xi tfisser li tkun ċittadin Ewropew.”
Il-Panels taċ-Ċittadini Ewropej, li jlaqqgħu flimkien 150 ruħ magħżulin b’mod aleatorju mis-27 pajjiż tal-UE biex jiddiskutu wiċċ imb wiċċ tema ta’ politika tal-UE, huma bbażati fuq prattika demokratika li ġejja mill-Greċja tal-qedem. Elfejn sena ilu, iċ-ċittadini Griegi ordinarji kienu jiltaqgħu fi gruppi biex jiddiskutu l-kwistjonijiet li kienu jaffettwaw il-ħajja tagħhom ta’ kuljum. Il-Panels taċ-Ċittadini tal-UE qabdu din l-idea u għaġnuha mill-ġdid għas-seklu 21, iżda l-prinċipju jibqa’ l-istess: li ċ-ċittadini jaqsmu u jiddiskutu l-fehmiet tagħhom fil-livell Ewropew dwar kwistjonijiet li jikkonċernawhom.
Il-weekend li għadda beda staġun ġdid ta’ panels taċ-ċittadini, meta fi Brussell saret l-ewwel sessjoni tal-Panel taċ-Ċittadini dwar ir-Reżiljenza Demokratika. Wara li joħroġ b’ideat dwar it-tema u jeżaminahom, il-Panel se jiżviluppa sett ta’ rakkomandazzjonijiet li se jiġu ppreżentati lill-Kummissjoni Ewropea biex jikkontribwixxu direttament għall-ħidma tal-Kummissjoni ħalli ssaħħaħ id-demokrazija.
Il-panels taċ-ċittadini ilhom isiru regolarment għal dawn l-aħħar ħames snin. Diġà ħadu sehem fihom aktar minn 1,000 ċittadin tal-UE, li kienu ta’ għajnuna fl-elaborazzjoni tal-politika dwar suġġetti bħat-tħejjija għall-kriżijiet, il-baġit tal-UE, u l-ġlieda kontra l-mibegħda. Terz tal-parteċipanti huma żgħażagħ iżda l-għażla hija kompletament aleatorja. B’dan il-mod, id-diskussjonijiet jirriflettu varjetà wiesgħa ta’ perspettivi u opinjonijiet, u r-rakkomandazzjonijiet li jirriżultaw ikunu demokratiċi.
Min jaf? Meta jerġa’ jċempillek it-telefown, jista’ jkun imissek int.
Għal iktar informazzjoni
Il-Panels taċ-Ċittadini Ewropej
Ir-Reżiljenza demokratika — Panel taċ-Ċittadini Ewropej
- Data tal-pubblikazzjoni
- 23 Settembru 2026
- Awtur
- Id-Direttorat Ġenerali għall-Komunikazzjoni