❤️Tá tú i ndiaidh meaitseáil le duine eile. Cad í an chéad chéim eile?
Spreagadh chun taistil an grá. Cabhraíonn an tAontas leat an ceann scríbe sin a bhaint amach.
Uaireanta, an bealach is fearr bhun bualadh le daoine nua ná do chód poist a athrú. Tugann Erasmus+ deiseanna do dhaoine tabhairt faoi staidéar, oiliúint agus obair dheonach agus taithí a fháil thar lear ar fud na hEorpa agus níos faide i gcéin.
Seans go n-imeoidh tú i gcomhair seimeastair agus go bhfillfidh tú agus teanga nua ar do thoil agat, cairde nua agat, agus muinín nua agat - nó ceangal déanta agat nach raibh coinne agat leis riamh.
Níor cheart costais fánaíochta a bheith i gceist le ceangal a dhéanamh. Agus tú ag taisteal laistigh den Aontas, is féidir leat do ghuthán póca a úsáid amhail is gur sa bhaile atá tú: tá glaonna, téacsanna agus sonraí móibíleacha san áireamh faoi rialacha an Aontais maidir le ‘fánaíocht ar tháillí baile’, faoi réir teorainneacha úsáide córa.
Mar sin, féadfaidh tú an comhrá a choinneáil ar bun ó Liospóin go Liúibleána, ó Pháras go Prág, ón mBruiséil go Grenoble, nó aon áit eatarthu.
Tá an tAontas ag déanamh caighdeán luchtúcháin uilíoch de USB-C le haghaidh go leor gléasanna leictreonacha, rud a fhágfaidh nach gcaithfidh tú a oiread sin luchtairí éagsúla a iompar leat agus a chuideoidh i dtaobh an dramhaíl leictreonach a laghdú.
Agus gan i gceist ach aon luchtaire amháin, b’fhéidir go bhféadfá rud amháin a bhaint den liosta rudaí atá le cur san áireamh agat agus tú ag pacáil don turas deireadh seachtaine sin.
Tá sé de cheart ag saoránaigh an Aontais gluaiseacht agus cónaí faoi shaoirse ar fud thíortha an Aontais, agus coinníollacha áirithe ann a bhraitheann ar do chás féin.
Ciallaíonn sé sin nach gá gur i do chathair féin a bheadh do chéad choinne eile. Ní gá gur i do thír féin a thitfeadh an chéad chaibidil eile de do shaol amach, go fiú.
Leis an gCárta Eorpach um Árachas Sláinte, bíonn cónaitheoirí incháilithe de chuid an Aontais in ann cúram sláinte stáit a fháil a bhfuil gá leis ó thaobh leighis de le linn dóibh a bheith ag fanacht go sealadach i dtír eile san Aontas, faoi na coinníollacha céanna agus ar an gcostas céanna a bhíonn i gceist i gcás daoine atá faoi árachas sa tír sin.
Mar sin, má chuirtear síneadh gan choinne le do thuras deireadh seachtaine, is féidir leat suaimhneas intinne a bheith agat agus tú i mbun taistil.
Níl aon chead de dhíth chun grá a thabhairt. Tá comhionannas ag dul do gach duine.
Ar fud an Aontais, cearta bunúsacha is ea an comhionannas agus an neamh-idirdhealú. Cosnaíonn dlí an Aontais daoine ar idirdhealú ar fhorais lena bhfuil gnéaschlaonadh san áireamh, agus an tAontas ag leanúint de bheith ag obair i dtreo comhionannas a bhaint amach do dhaoine LADTIA+.
